India ram Power inpek kualna Transmission line hrang hrang, Sub-Station lian te, Electric Power siam chhuahna Generating Station te hi tun dinhmun ah chuan ram pumah a inzawm khawm vek tawh a, chu chu Grid Power System an tih thin hi a ni. Chutianga inthlunzawm tlang vek a nih avang chuan State thenkhatin Power an chan tur aia tam an lakin State dang mai bakah ram pum Power Supply a tibuai theiin Power Supply dinhmun a ti khaihlak in a tichhe vek thin.
Mizoram pawh hi hman tur power mamawh phuhruk tur la nei lo a nih avangin Grid Power ah in nghah lehzual a ngai a, Grid a buai hlek pawhin Mizoram pumpui Power dinhmun a khawih nghal thin. Nimin (31.7.2012) a India ram hmarlam leh khawchhak lam pang a Power Supply a buaina nasa tak a thlen chungchangah pawh khan Report hmasa a a lan danin State pathum UP, Punjab leh Haryana ten an power chanvo aia tam an lo lak vang a ni. Hemi tum hian India ram mihring maktaduai ruk (6 millions) velin power supply an neih loh phah a, train service te a khaihlakin hmun thenkhatah chuan lungalhthei laihchhuahna khurah te an tang a, lirthei kalphung pawh a buai phah vek in nitin nunphung a buaiphah nasa hle. Hetiang dinhmunah hian Mizoram pawh englai pawhin a ding thei a ni.
He thil thleng hi India sorkar pawhin a ngai thutak hle a, a chhui chiang tur mi pathum awmna Committee a din nghal a, ni 16 chhunga report thehlut turin thupek a siam a ni.
Grid Power Supply tha tak nei tur chuan Generating Station atanga Power siam chhuah leh Power hman zat a inbuk tawk tur a ni a ; siamchhuah aia hmanral a lo san emaw, tlem lutuk avangte in Frequency a lo hniamin a lo sang thei a. Frequency hi 49.7 Hz leh 50.2Hz inkara awm ngei tur a ni a, hemi piah lama Frequency a awmin Grid Power System pumpui a tibuai vek thin. Frequency hi 49.7 Hz. aia a hniam chuan tu state mah in mahni chanvo aia tam lak hi Indian Electricity Grid Code chuan a khap tlat a. Mizoram chhunga Grid System pawh Grid Code hian a thunun a, Grid System ah dik lohna a awm in Mizoram pawh in a tuar lo thei lo a, a hun emaw hun lo emaw load shedding siam a ngai thin. Hetiang dinhmun anih avangin Electric Power hmangtu zawng zawng ten an hriatthiam ngei ngei a tul a ni.
