Champhai District Karate Association chuan 14 - 15 August, 2012 chhunga International Okinawan Shorin Ryu Selbukan Karate Do of India leh Regional Sports Centre, Kadavanthara, Kochi tangkawp buatsaih 3rd RSC National Karate & Kobudo Championship 2012 neih turah player tirh tumin ngawrh takin an inbuatsaih chho mek zel a. He inelna neih tura tel tur leh 1st - 3rd August, 2012 a Lunglei-a Inter District Karate Championship neih tura tel tur hian ni 28 June, 2012 atang khan ngawrh takin inbuatsaihna hi an kalpui chho a, tunah hian la kalpui chhoh zel niin, nimin khan Lunglei lam pan Karate a tel tur naupang thlanchhuah mi 13 leh anmahni kaihruai tur Instructor leh Coach 2 nen an fehchhuak ta a.
Kochi-a 3rd RSC National Karate & Kobudo Championship 2012 neih tura Karate player an chher thiam mek te zinga a tha zual zinga mite hi AMKA Gen. Hqrs. Treasurer Pu H.C. Laldova kaihhruaina hnuaiah ni 25 - 26 July, 2012 khan Champhai a Inspector Pu Lenghmingthanga, Black Belt nen tehna chi hrang hrang hmangin selection neih pui an ni a. Training tawp lam hun remchangah Sports Council lam atangin Medical Fitness endik leh an ni ang a, heng Karate Player te hi sawrkar suma tirh tur an nih avangin Karate zirlai thlan chungchangah hian an uluk hle a ni.
Heng Karate zirlaite hi Keraa-ah hian an Instructor Pu Lenghmingthanga chu Team Coach atan ruat niin, Pi Lalneihthari Tlaisun chu Team Manager atan ruat a ni. Champhai District Karate Association hian kum 2012 khan Chennai-a International Karate Championship ah player lo tir tawhin player pahnih ten Bronze Medal an lo la tawh a. Anni pahnih hi Sport Incentive Cash Award Rs. 1,00,000/- (Cheng nuai khat) dawng turin thlan fel a ni tawh bawk.
