1777/2023-2024

Vawiin Nilaini (6.9.2023) khân Mizoram Pollution Control Board leh NIT Mizoram-te tangkawp buatsaih National Hackathon on Waste Reduction chu khârin lâwmman sem nghal a ni. He hun hi Khatlâ-a PHQ Multipurpose Hall-ah hman niin NIT zirlaite leh mi thiam sâwm bîkte an tel a ni.

Sawrkâr laipui hnuaia Mission LiFE-in ti tura a tih angin National Hackathon hi buatsaih a ni a, India ram chhûng hmun hrang hrang atangin IT zirlaite leh IT lama tui mite an tel a, July thla tîr atang khân ti tanin zawh fel a ni ta a ni.

Nimin Thawhlehni khân IIT Kharagpur-a Prof. Brajesh Kumar Dubey-a leh Central Pollution Control Board-a Scientist Pu R.P. Gurung-a te’n online-in Waste Reduction chungchâng hi zirtirna an rawn pe a, kal khâwmte hian Mission LiFE hnuaiah environment humhima tichhe lo turin thu an tiam nghal vek bawk a ni. Chawhnu lamah zirlai titha zual thlanchhuah 10-te’n power-point presentation hmangin an thil siamte entirin an inel nghal bawk a, NIT Mizoram leh PHED Mizoram leh MPCB atanga mithiam sâwm bîkte’n an endik nghal bawk a ni.

Vawiin chawhnû khân he National Hackathon inelna-a tithate hnênah hian lâwmman sem a ni a, certificate leh tangka fai thahnem tak a keng tel a ni. Lâwmman semna hi NIT Mizoram Deputy Registrar Pi Lalthianghlimi Zote chuan hmanpuiin lâwmman hi a sem nghal a ni.

Result chu a hnuai ami ang hi a ni e.

Category I:

1^st Prize – Team Visioners

2^nd Prize – Vanlalthlamuana

3^rd Prize – Waste Revolution

Category II:

1^st Prize – Big Byte Coders

2^nd Prize – GSM Bin Trackers

3^rd Prize – E-Hub