2144/2026-2027 

Dated Aizawl the 9^th September, 2026: National Health Mission (NHM), Health & Family Welfare Department, Government of Mizoram leh Johns Hopkins University hnuaia Global Health Organisation, Jhpiego te chuan Mizoram chhunga Health System hmasawnna turin thawhhona thuthlung Memorandum of Association (MoA) chu vawiin khan Health Minister Pi Lalrinpuii office chamber-ah an ziak. Mizoram sawrkar aiawhin National Health Mission Mission Director Dr. R. Lalchhuanawma leh Jhpiego aiawhin India Country Director Dr. Amit Shah ten Minister hriatpuina in hming an ziak a ni.

Health Minister Pi Lalrinpuii chuan MoA sign a ni ta chu lawmawm a tih thu a sawi a. Mizoram Sawrkar nen thawk dun turin Jhpiego-in intiamkamna an nei chu lawmawm a tih thu a sawi. Mizoram-a health system tih chakna tur leh mipuite hrisel nana health care tha siam turin thawhhona nghet leh chak a pawimawh hle tih a sawi bawk.

Government of Mizoram leh Jhpiego ten thawhhona changtlung zawk an neih dawn tak avangin, he MoA hi Mizoram health system tihmasawnna leh tihchangtlung zelna kawngah rahbi thar chhinchhiahtlak tak a ni, Pi Lalrinpuii chuan a ti a. He thawhhona hian hriselna kawnga hmasawn zelna turin Mizoram sawrkar a tanpui ngei a beisei a ni.

Dr. R. Lalchhuanawma, Mission Director, National Health Mission chuan Jhpiego te nen thawhhona tha tak an lo neih tawh avanga lawmthu sawiin Comprehensive Health Care-ah nasa taka hmasawnna hmuh tur a awm tawh thu a sawi a. MoA sign a ni ta hi lawmawm a tih thu sawiin,  mipuite rawngbawlna kawngah Health Department-in hma nasa taka a sawn ngei a beisei thu a sawi bawk. 

He inremna hi Comprehensive Primary Health Care, Nutrition, Reproductive, Maternal, Newborn, Child and Adolescent Health (RMNCAH+A), Communicable leh Non-Communicable Diseases te pawh telin, health lama thil pawimawh hrang hrangah thawhhona leh intanpui tawnna tura duan a ni.

Jhpiego India Country Director, Dr. Amit Shah chuan MoA thil tum chi hrang hrang sawifiahna leh inhmelhriattirna a nei a. NHM, Mizoram nena thawhhona tha tak neih ngei a beisei thu leh Mizoram mipuite tan rah tha a chhuah ngei a duh thu a sawi a ni.

Programme hi Pi Lalnunmawii, Additional Secretary, Health & Family Welfare Department chuan kaihruaiin, an kalkhawm chhan sawifiahna hun a hmang a. Dr. Lily Chhakchhuak, Director of Health Services, Health & Family Welfare Department chuan lawmthu sawiin programme a khar a ni.