2145/2026-2027 

Dated Khawzawl, the 9th September, 2026 : Vawiin khan Khawzawl Watson Division buatsaihin Khawzawl District chhunga Village Water and Sanitation Committee (VWSC) te tan tui lak leh faina kawnga khawtlang hmasawnna tur chungchang inzirtirna hun One Day Training chu District Panchayat Resource Centre (DPRC), Darngawn Veng, Khawzawlah neih a ni a. He hun hi Khawzawl District Addl. DC Pu K. Zorammuana chuan khuallian niin a hmanpui a, Er. Liantluanga Chohte, Sr. EE, PHED chuan hun a khaihruai a ni.

Khuallian hian training hawnna leh thusawina hun neiin, VWSC-te chu sawrkar leh khawtlang inkarah palai hna thawktu pawimawh tak an ni a, khawtlang nunna khawihtu mi pawimawh tak an nih thu a sawi a. Tui chu nikhat pawh a tello a kan awm theihloh thu sawiin, training hlawkthlak taka hmang turin duhsakna a hlan a. SWM Rules 2026 a rawn pian tak avangin bawlhhlawh thliar hran a tulzia a sawi a, bawlhhlawh thliar hran hi kan nungcha, ramngaw leh tuihna venhim nan a pawimawh hle a ni tih sawiin, tuihna tikang theitu ramngaw tihkan laka fimkhur turin leh kan lo neih dan Jhum Cultivation ti tlem a, thlai leh lo kumhlun chi lama hma la chho turin kalkhawmte chu a chah a ni.

He training-ah hian VWSC mawhphurna, tui tihthianghlim dan, faina chungchang, SWM Rules 2026, Solar Pumping leh Gravity Water Supply Scheme chungchang zirho a ni a. Resource person atan Er. Freddy Vanlalmuanawma, SDO, PHED, Pu TBC Lalthangzawna, JE, PHED, Pi Zoramchhani Hlondo, JE, PHED, Pu KC Lalmuanzuala, Technical Assistant leh Pu TC Lalhmachhuana, District Coordinator te hman an ni.

He hunah hian PHED-in khaw tina VWSC a din khaw 25 atangin VWSC Chairman, Secretary leh Tuipu Member 75 an kalkhawm thei a ni.