4163/2023-2024

Aizawl, 14th March, 2024: Vawiin atangin ni 2 chhung awh tur National Health Mission State Level Review Meeting chu Directorate of Hospital & Medical  Education Auditorium, MINECO ah neih a ni a. H&FW minister Pi Lalrinpuii chu khuallian niin, Pi Esther Lalruatkimi, Principal Secretary, H&FW Department chuan Review Meeting hi a kaihruai a ni.

Pi Esther Lalruatkimi, chuan National Health Mission chungchang sawifiahin, Centrally-sponsored Scheme a nih thu leh Mission Mode-a kal pui a nih thu a sawi a, National Health Programme hrang hranga target te chu Sustainable Development Goals (SDGs) nena inkaihhnawih tlat a nih thu sawiin, Programme hrang hrang ah hian Review leh Monitoring hi tan lak chhoh deuh deuh a pawimawh thu leh best practices and Innovation nei tura ruahmanna fel tak neia hmalak a pawimawh thu a sawi. Mizoram pumah Health Care Services mipuite hnenah pek thin a ni a, hetah hian tumah hmaih lovin “Leave no one behind” tih hi kan thupui pawimawh tak tur a nih thu a sawi bawk. Heng bakah hian TB leh Malaria mizoramah a tam thu leh he lama thawktu te pawh theihtawp an chhuahna-ah fakin taima leh rinawm taka thawk zel turin a chah bawk a ni.

Review Meeting-ah hian National Health Mission hnuaia hmalakna hrang hrangte Dr. Eric Zomawia, Mission Director hnen atangin ngaihthlak niin, Mipuite hriselna atana thahnemngai taka thawktu NHM staff zawng zawng te hnenah lawmthu a sawi. Mission Director chuan NHM hmachhawp hrang hrang te leh hmasawnna tur hrang hrang te a sawi bawk. NHM Mizoram hnuaia RCH Programme chuan teh fung hrang hrangah North East State zinga ti tha ber niin lawmman pakhatna “7th JRD Tata Memorial Awards” dawng theia kan awm chu a lawmawm thu a sawi.

He hunah hian Dr. Vanlalsawma, Principal Director, H&FW chuan NHM hmalakna hrang hrang te leh hlawhtlinna ah lawmthu a sawi a. Kan tum ber chu mipuite hriselna a nih avangin Health Sub Centre-a kan hnathawh te a pawimawh em em a, Sub Centre hmun kilkhawr tak takah te nau kan char thei ta hi hmasawnna ropui tak a nih thu a sawi.
Khuallian Pi Lallrinpuii, Hon’ble Minister, H&FW chuan vawiin hi World Kidney Day a ni a, Kidney hrisel tura kan inzirtir nasat a tul thu thuhma-ah a sawi a. National Health Mission hi Ministry pawhin a ngaih pawimawh em em a ni a, thawktu te pawhin hlawh lak nana thawk mai ni lova, mipuite hrisel nana thawk kan ni tih hrereng chunga thawk turin a chah. Thawktu indaih lohna nasa tak a awm a, hemi su kiang tur hian kan theih tawk in kan bei ang. Tele-medicine hi Sawrkar policy-a tel anih avangin a theih ang ang a ti changtlung turin Programme officer te ngenin Health Programme tam tak kan kalpui ah te theihtawp kan chhuah thin laiin damlo enkawl nen kan kaihkawp thiam a tul hle a ti a. Health Dept a thawktute an chhuanawm em em a, chutih rualin mipui tana thawk kan ni tih hria a, thawhhona tha nei turin a chah a. Hun vawn dik kawngah hmasawn zel tura chah in, Programme Officer te leh Staff zawng zawng te chu mahni programme theuh-a thahnemngai taka thawk turin leh Health Department tana theihtawp chhuah zel turin a chah bawk.

Health Minister Special Award siam niin NHM Mizoram hnuaia hmun harsa/khrihkhan taka rinawm leh tha taka thawktu mi 9 hnenah he award hi khuallian Pi Lalrinpuii'n a hlan a ni.

Ni 2 chhung awh tur Review Meeting ah hian NHM hnuaia Programme National Health Programme hrang hrang 37 hnuaia hmasawnna te a chang tu Officer te kaihhruaina hnuaiah thlirho a ni a, hmasawn zawk leh tha zawk a kal dan tur sawiho a ni bawk.