2975/2024-2025

Dated Kolasib the 13th November, 2024 : Vawiin khan Kolasib DC Conference Hall-ah National Highway 306 leh National Highway 06 siam hnathawh mek chak zawka hmalak a nih theih nan Kolasib DC kaihhruaina in thutkhawmna neih a ni.

Kolasib DC Pu Robert C. Lalhmangaiha chuan he thutkhawmna ah hian National Highway kawngpui tha neih a nih theih nana thutkhawmna neih a ni thei chu lawmawm a tih thu a sawi a. National Highway 306 leh National Highway 06 chu Mizoram State luhka kawng a nih angin State Life-Line pawimawh tak a nih thu a sawi a. Heng kawngpui ah te hian State mipuite ei leh bar leh mamawh hrang hrang chawkluhna a innghat a ni tih hriain NHIDCL-te leh Joint Action Committee thawhhona inkarah langtlang leh  thawhona tha tak neih a tul thu a sawi bawk. Kawngpui tha leh tlo siam a nih theih nan hmanraw tha leh tlo hmang turin NHIDCL aiawh kalte chu a chah a, an hmalakna kawnga harsatna awmte District Magistrate hnenah thlen hreh lo turin a chah bawk. 

Kolasib Senior SP David H. Lalthangliana  pawhin he hunah hian thu sawiin, NHIDCL te chu National Highway 306 leh National Highway 06 kawng siama hma an lakna ah chak zawk leh tha zawka an thawh theih nan Work Schedule leh an hmanraw hman turte leh an hmalakna te Working Group leh Monitoring Team-te nen inhrilhhre tha thin turin a chah a. Mizoram mipuite'n ram hmasawnna leh Sawrkar hmalakna te an ngaihvenin, khawtlang leh tlawmngai pawl hrang hrangte pawhin heng Sawrkar hmalakna ah hian a thawktute harsatna  sutkian kawngah pui turin an in huam tih hrereng turin a chah a. Kawng siam hna thawh laia lirthei kalin hna a tih khaihlak loh nan Kolasib Traffic Police lamte pawn hma an lak theih tur thu a sawi bawk.

Tun dinhmunah National Highway 306 leh National Highway 06 siamthat hna hi NHIDCL hnuaiah Balaji Construction Company-te'n an thawk mek a, Jungle Clearance leh Pot Hole hnawh hna thawh mek a ni a. Kawngpui Black Top hna chak taka thawk tur an inbuatsaih tan mek a. Kum 2025 March thlaah Vairengte to Bilkhawthlir leh Kolasib to Kawnpui kawngpui thawmthat hna zawh hman tura beisei a ni. 

He thutkhawmna ah  hian Kolasib Addl DC, Kawnpui SDO Civil, Mizoram NHIDCL a thawktute, Kolasib District Joint YMA-te leh Kolasib District Village Council President-te bakah Highway Construction Company-te an tel a ni.