No.5569/2020-2021

Tukin khan NH 54 atanga Vaivakawn panna tur kawng RCC concrete a siam tur chu bialtu MLA leh IPR Minister ni bawk Pu Lalruatkima chuan tlawhin PWD hotute leh khawtlang hruaitute nen kawngsiamna tur hmunhma hi an enfiah a, tun hma lam atang tawhin NH 54 Hunthar leitla hniam avanga kawng tlan tlang theih loh a awmfo chu Covid-19 avanga sum harsa tak chung pawhin PWD changtu Chief Minister Pu Zoramthanga'n a ngaihpawimawh avangin siam tura hmalak anih thu Minister chuan sawiin mimal ram engemawchen lak hek ngaite pawh khawtlang hruaitute nena enfiah niin kan eibar chawk luhna kawng pawimawh tak khuarel chhiatna thleng thin avanga harsatna kan tawh thin tih zia awm anih theihna tura mimal ram petute chungah bialtu MLA Pu Lalruatkima chuan lawmthu a sawi bawk ani.

NH 54 atanga kawng helna siam thar tur hi PWD in an enkawl dawn a, kawng hi metre 3.3 a zau tur niin kawng thui zawng hi metre 330 vela thui tur ani dawn a, sum ruahman ang chuan cheng nuai 166 chuang niin hnathawh tan atanga thla 6 chhunga zawh tur ani dawn a ni.

Minister Pu Lalruatkima hian Vaivakawn atanga Ropaiabawk kawng Chawlhmun a chhuak tur RCC Concrete a siam mek pawh enfiah nghalin mipui ten kawngtha kan duh rualin kawng tichhe zawnga insakna bungrua emaw kan tui luankawr te kawng tihchhe zawnga luan tir lo turin mitin te kan inchah thar leh a ni, a ti.