Kolasib District chhunga National Highway Contractor thlan fel har chungchang tunhnaia tualchhung chanchinbu-a lo lang chu a hnuaia mi ang hian Mizoram State PWD chuan a sawifiah.

Kolasib District chhunga National Highway pathum siamthat nana pawisa sanction diam tawh, Regional Office, Guwahati lamin an tihfel har vanga hna tan lawk theih loh thu a chhuah kha a dik a. Highway hna tender reng reng hi State PWD-in technical evaluation an tihfel hnuah Gauhati R.O. hnena thawn a, a lo pawmpui hnuah chauh financial bid hawn leh theih a ni thin a. Anni khuan State 8 lai an enkawlin, thawktu an tlem avangin an thawk chak thei lova, hna tam tak a khawtlai phah thin reng a ni.

State PWD-in a umzui reng a, Guwahati-ah officer intirin an zu tihfelpui tawh a. Tunah chuan NH 306A, Vairengte-Tuirial hna thawk turin G.P.Project Ltd. hnenah work order pekfel a ni tawhin, hna thawk turin an inbuatsaih tan thei tawh a; thalah chuan hna tan ngei tura ngaih an ni. Chutiang bawkin, NH 54, Lailapur-Bilkhawthlir(Km 40.700-70) hna thawk turin Sunshine Overseas Ltd hnenah work order pek a ni tawh bawk a; an ni pawh hian tan turin hma an la tan mek a, thal chhunga an thawh ngei a ngai ang. A 3-na, NH 154, Km 105-119(Bairabi kawng) erawh chu tender chhang hniamber chhanna rate chu State Sawrkar pawm theih piah lam anih avangin Central Ministry lamah an pawmpui tura thawn mek a ni. Hei pawh hi thil a kalsual loh chuan thal lo awm tur chhung chuan thawh ngei beisei a ni.