Mizoram Sorkara General Administration Department chuan nimin ni 16.8.2017 khan Mizoram House chungchang sorkar hnathawk leh mipui mimirte hriat turin a hnuaia mi ang hian thuchhuah a siam a ni :

1. Mizoram House-a thleng tur ten GAD-a reservation an dilnaa an mi hruai tur zat an sawi aia tam an room-ah thlen phal a ni lova, tilui an awm thin avangin House thuneitute leh enkawltute tan harsatna an siamsak thin a. Tunchinah chuan reservation an dilnaa an ziahlan bak mikhual dang an room-ah thlen phal a ni lovang.

2. Mizoram House-a thlen thin thenkhat ten an room-ah an chhungte/thiante riak turin an sawm thin a, reservation hi per room ni lovin per head-a pek a nih avangin, reservation dilnaa ziahlan ni lo mi tute mah riahluh phal a ni lo.

3. Mizoram House-a thleng tur ten an kal hmain House thuneitute nen an thlenna tur tichiang (confirm) phawt tur a ni. An thlenna tur Mizoram House ber an hriatchian a tul a, hrechiang lova thlen tum ringawt thin ten House enkawltute tan harsatna an siam phah thin a. Chuvangin, Mizoram House khawiah pawh reservation neite chuan a hnuaia Mizoram House hrang hrang phone nos. ah hian zawhchian emaw confirm phawt tura ngen an ni :

New Delhi - (011) 23015446

Kolkata - (033) 2520626

Silchar - (03842) 225655

Shillong - (0364) 2225068

Guwahati - (0361) 2529626

Mumbai - (022) 65784852

Bengaluru - (080) 26684815

4. Members of Parliament, Mizoram leh Members of Legislative Assembly, Mizoram te chu an term chhungin eng hunah pawh Mizoram House-a an thleng a nih chuan ‘officials on duty’ anga ngaih tur an ni.