Vawiin khan Agriculture Committee Room-ah PMKSY Review Meeting neih a ni a. Review Meeting hi Joint Director of Agriculture (Planning & Monitoring) Pu Rohmingthanga Colney-in a kaihruaiin Director of Agriculture (Crop Husbandry) Pu J. Lalzamliana-in a hmanpui. District hrang hranga District Agriculture Officer te leh Department Officer pawimawh dangte an tel a ni.

Pu J. Lalzamliana, Director of Agriculture (Crop Husbandry) chuan Review Meeting neih hian rah tha a chhuah thin chu lawmawm a tih thu a sawi a. Agriculture Department Officers ten hnathawh hrang hrangte an vil ngun thin tur leh hnathawh tur hmunhma te felfai taka thlang chhuakin Scheme dangte nena kalkawp theih dan zawn tel zel turin a chah a. Agriculture Department hmalakna leh hnathawh reng rengah kuthnathawktuten a tangkai thei ang berin an chhawr thei tura kalpui a pawimawh ber a ni, a ti.

Vawiina Review Meeting-ah hian Subject Matter Specialist Pu Pradip Chhetri chuan Power Point hmangin Scheme kalphung leh hnathawhte zirtirna hun a hmang a. District Agriculture Officer-ten an District theuha an hmalak dan Power Point hmangin an entir bawk.  Kum 2017-2018 chhunga hmalak lehna tur ‘Action Plan’ te thlirho nghal a ni bawk.

Pradhan Mantri Krishi Sinchayee Yojona (PMKSY) Scheme hi Agriculture Department bakah Horticulture, Rural Development leh Irrigation & Water Resources Department ten an thawk a ni. Buh leh bal tharchhuah leh ram leilung enkawl leh venhimna kawngah tui pawimawhzia hriain sorkar laipui chuan he Scheme hi a din a, a tum ber chu buh leh bal chinna hmun reng rengah tui a awm tur a ni tih hi a ni.  Hetih rual hian a awmsa pawh a tangkai thei ang bera hman leh ruahtui luangral mai mai turte pawh tangkai zawka hmandan ngaihtuah bakah ram leilung a tihchhiat mai loh nana hmalak leh enkawl te a huam bawk a ni.

PMKSY hnuaiah hian hnathawh hrang hrang awmin, heng hnate hi Mizoramin tha taka a thawh avangin ‘Prime Minister’s Award for Excellence in Public Administration 2017’ pawh kumin April thla khan a lo dawng tawh a ni.