Mizo Hindi Zirlai Pawl (MHZP) buatsaihin vawiin khan Chanmari YMA Hall-ah National Hindi Day (Hindi Diwas) vawi -66na hman a ni a. Environment & Forests Minister Pu Lalrinmawia Ralte chu khuallian a ni.

Minister chuan India rama cheng kan nih avangin Hindi hi a pawimawh em em a, India ram hi kan ta tih ngamna thinlung pu tur chuan Hindi kan thiam a ngai a ni, a ti. Pu Lalrinmawia Ralte chuan  ram chhung hmun dangah hnathawk turin thalai an chhuak fova, harsatna an tawh lian ber chu Hindi tawng a ni, a ti a. India ramah chuan englai pawhin a pawimawh reng dawn a, tawng kan thiam phawt chuan khawi hmunah pawh Mizo thalaite tan hna hmuh a harsa ngailo, a ti.  Tawng hi a ruka thiam chi a ni lo a, hman tama thiam chi a nih avangin an theih ang anga hmang tam turin Minister chuan zirlaite a chah a ni.

National Hindi Day lawmna inkhawm hi MHZP Vice President Lalrammawia’n a kaihruai a.An President PC Vanlalruata, Mizoram Hindi Prachar Sabha Chairman Pu PB Lalbiakliana, Mizoram Hindi Training College Asst. Prof. R.Lalthlamuani, Dr.Gunu Gharti leh Mizo Students Union aiawhte’n thu an sawi.

Vawiin hian kumin National Hindi Prachar Sabha result chhuaka titha te hnenah chawimawina hlan a ni a. Hindi BA top 3 te hnenah VL Nghaka Award,  PU top 3 hnenah PC Zaruma Award leh Class X top 3 te hnenah R.Zahleia Award an hlan a ni.