Mizoram Chakma Students Union Zonal Hqrs, Aizawl chuan vawiin khan Vanapa Hall-ah 11th Fresher's Social meet, 2015 an hmang a, Pu John Rotluangliana, Minister of Tourism etc. chuan a hmanpui.

Mizoram-a hnam hrang hrang, tawng hrang hrang hmang awm khawm te hi lungrual taka awm tlangin Mizoram hmasawnna tur leh thawhona atan tanrual a ngaih thu khuallian Pu John Rotluangliana chuan sawiin, Mizorama khawsa leh chengte chuan Mizo tawng thiam a pawimawh a, mahni awmna tawng thiam chuan kan awmna ramah kan tlangnel thin tiin M izote pawh India rama awm kan ni a, Hindi tawng kan thiam viau loh chuan phai ramah kan tlangnel tak tak thei lo a, chutiang zel in kan chenna state tawng hi thiam hi a pawimawh a. Chu chuan inlungrualna leh in unau tawnna min thlen thin a ni a ti.

High School leh College kal hun lai te hi hringnuna kan hriat reng fo leh nuam kan tih ber hun lai a ni a, a nawmna ah tawlh thlu lovin kan nakin hun tur atana inchhir lohna turin nun hman a pawimawh zia leh Zirlaite chu taima tak leh thahnem ngai taka lehkha zir tura fuihin minister chuan nu leh pa avanga zir thei a awm an nih chu in hriaa, hlawhtling ngeia zir chhuak tura fuihin Graduate hnathawk tlak ni tur leh thiam si lo a passed ringawt tum lo turin a chah a. State chhungah ngawt eizawnna a vang tawh a, chuvanga state pawn leh India ram pawn thleng pawha inzar pharhin eizawnna tlak thiamna an neih a pawimawh thu a sawi.Chakma Student’s Union hruaitute hnenah fresher's social an hman tanpuina atan hian Minister chuan Rs. 10000 a hlan a ni.

Chakma Students Union te'n Fresher Social an hmanna ah hian khualzahawm Dr. Buddha Dhan Chakma, Minister of Sericulture & Fisheries pawhin thu a sawi a, Aizawl leh state pawn atanga lo kal zirlai hruaitute'n thu an sawi bawk a, zai leh lam hmuhnawm tak takte entirin nilenga hun hman a ni.