AH&Vety Minister Pu C.Ngunlianchunga chuan vawiin khan I&PR Auditorium-ah Mizo Students Union, Sub-Headquarters, Thingsai buatsaih zirlai pass thar leh an khawchhuak mi hlawhtling, prominent citizen te chawimawina hun a hmanpui.

Minister chuan chawimawitlakte chawimawi nachang hria Thingsai MSU-te fakin Pathian thu anga lawm te lawmpui tur leh tap te tahpui tur kan nih laiin Mizoram Kristiante hian lawmte lawmpui harsa kan tifo thin a, Thingsai MSU te erawh chuan BA leh a chunglam pass chhuakte leh an khawchhuak mi hlawhtlingte an chawimawi chu a lawmawm hle a ni, a ti a. Thinlung atanga chhuak mahni khuate inhmangaih tawnna leh induhsakna tak tak atang lo chuan a tih theih loh a ni, a ti. Pu C.Ngunlianchunga chuan zirlai pass tharte fuihin tuna an dinhmun hi duhtawk mai lovin chawimawi chhunzawm tlaka an nun hmang turin a chah a. Mi tam tak chuan hlawhtlinna an chanin an zo lo a, an nun tichhetu a ni fo thin tiin khawi kawng pawh zawh sela an awmna leh an hma zawn theuhah mi dik, tangkai leh rintlak ni turin a fuih a. Mi hlawhtling dik tak te chu mi rintlak, mite tana malsawmna, sawrkar, khawtlang leh chhungkaw tana innghahna tlak leh belhfakawm an ni thin, a ti.

Vawiin hian BA pass thar mi 17 hnenah “Lalsangzuali Sailo Award” an hlan a, MA pass thar mi 3 hnenah “Selthuama Award” an hlan a. Thingsai khawchhuak prominent citizen mi sawmpakhat - Pu P.Rohmingthanga, Pu Liankima Lailung, Pu M.Tumsanga, Pu Michael Zothankhuma, Pu L.Saihlira, Pu F.Lawmkima, Evan K.Lianthanga, Pu P.Lalbiaka, Pu Lalrinkima Hnamte, Pu J.Thatlinga leh Pu F.Aihnuna te hnenah chawimawina thuziak an hlan bawk.

Thingsai khua BA chin chunglam zirlai pass tharte leh prominent citizen chawimawina programme hi chawhma leh chawhnu a then hran niin chawhma lam hi Thingsai MSU President Lalchansanga Chinzah chuan a kaihruai a, chawhnu programme hi an Vice President F.Lallianzuala’n a kaihruai a ni.