Chief Minister Pu Lal Thanhawla chuan ‘Puipunna leh meizuk phallohna hmuna meizu man turin Police zawng zawng te chu thuneihna pek an ni tawh’ a ti. He thu hi vawiin Mizoram State Anti Tobacco Day vawi 2-na, Lal Thanhawla Auditorium, Treasury Square, Aizawla hmanna inkhawm buatsaiha a sawi a ni.

Chief Minister chuan Mizorama vaihlo do tura Indian Society on Tobacco & Health, Mizoram Chapter in kum 1989 a hma alak tirha mi te nuihzat leh runluih thin a nih thu sawiin, an hnathawh hi Pathian duh zawng anih avangin tunah chuan a hlawhtlinna kan hmu chho mek a ni a ti a. Pathianin pawnlam leh chhungrila thianghlim tura min duhna hi kan theihnghilh tur a nilo a ti a. Setana’n Mizo kristiante min beihna hmanrua ber chu vaihlo a ni tiin, Pu Hawla chuan ringtu kan nihna atangin tan kan lak angai a, vaihlo leh a kaihhnawih laka simtu ni mai lova midangte kaihruaitu nih kan tum a pawimawh hle a, Mizoram State Anti Tobacco Day atang hian keimahni chauh nilo, midangte chhanchhuak thei khawpa tan la turin mipuite a sawm a ni.

Chief Minister chuan India rama Mizoramin a ber kan nihna, vaihlo hmang nasa ber, cancer tamna ber leh HIV + vei tamna ber state zinga kan tel hi a chhuanawmlo hle a ni tiin, ringtu kan nihna atang pawh hian tan kan lak hle angai a ni a ti a. Vaihlo dona kawnga Mizoram State Tobacco Control Society hmalakna te a tarlang bawkin, Ruihhlo zuara Taxi leh Sumo man an nih chuan motor permit leh a khalhtu driving license tih tawp sak an nih tur thu a sawi nawn bawk a ni.

Chief Minister hian vaihlo dona kawnga district ti tha zual pathumte hnenah lawmman citation a hlan nghal bawk a. A ti tha ber chu Mamit District niin, Serchhip Districtin a dawt a, pathumna lawmman dawngtu chu Kolasib District a ni.

Pi Lal Riliani, President, Indian Society on Tobacco & Health, Mizoram Chapter pawhin thu sawiin, Anti Tobacco Day puan hi khua leh tui tha te tana thil pawimawh tak anih avangin, vawiin tan chauh nilo hun lokal leh zel tur atan a ni tih i hria ang u a ti a. Vaihlo hmanna hian puar leh fanna min pelo a, alo thlawna sum khawhralna chauh ani tiin, Vaihlo hian kan taksa khawl pawimawh tak tak a tih chhiat theih avangin, ‘la hmang thin ten vawiin atang chuan fihlim turin ka sawm che u a ni’ Pi Rii chuan a ti.

Inkhawmah hian Dr. Rana J.Singh, Sr. Technical Adviser, The International Union Against Tuberculosis & Lung Diseases (The UNION), South East Asia Office, New Delhi in Mizoram State Tobacco Control Society (MSTCS) thawhpui ISTH (M), MHIP, MJA leh MZP te hnenah lawmthu sawina citation a hlan bawk a ni.

COPTA dan hmanga Anti Tobacco Squadin kum 2009 - 2015 chhunga phallohna hmuna meizu an man te atanga sum chawi tir chu Cheng nuai hnih leh singthum chuang a tlin thu inkhawmah report a ni a, Tobacco Cessation Clinic Reportah meizu 5.4 lakhs zingah sim zat chu 12% anih thu tarlan a ni bawk.

MSTCS hi 9th April 2009 khan din a ni a. A hmalaknain Mizoram State Anti Tobacco Day hi nikum 2014 atang khan hman chhoh tan a ni. Khawvel pum huapa vaihlo dotu pawl Bloomberg Initiative to Reduce Tobacco Use in The UNION kaltlangin MSTCS hi Grant vawi thum, 2009, 2013 leh 2015 khan a rawn pe tawh bawk a ni.

Inkhawm hi Pu Lalhmingthanga, Health Secretary a kaihruai a, Minister, Parliamentary Secretary, MLA leh official lian an tel tha hle a ni.