India ram pum huap, Bharat Scouts & Guides National Headquarters, New Delhi bultuma kar khat chhung awh National Integration Camp(NIC), State Training Centre, Tanhrila buatsaih chu nimin tlai khan kharna hun hman a ni a, Chief Minister Pu Lal Thanhawla chu khuallian a ni.

Chief Minister chuan India rama tlawh hlawhlo ber, Mizorama Bharat Scouts & Guides, National Headquarters, New Delhi in National Integration Camp an rawt nghat chu thinlung taka lawmthu sawiin, camp a rawn tel zawng zawngte chu chibai a buk a. India ram ropui tak hi hnam chi hrang tam tak awmna, sakhua leh hnam nunphung inpersan tak takte chenna ram nimahse, a hmasa berin Indian kan ni tih inhria a, kan inpumkhatna leh kan inunauna tha tak hi tuma tihchhiat i phal lovang u tiin campers te chu a sawm a. Thalai rual, chak taka hnathawk thei tam takte hian kan mizia leh rilru sukthlekte inanglo mahse, India ram democracy hi tun aia chak zawk hian ke in pen tir thei a ni a ti a. Ram inpumkhatna tur hian mitinin mahni theih tawk theuh kan thawh thei a, chanvo leh mawhphurhnate intluk tlang takin kan nei vek a ni a ti.

Chief Minister chuan he National Integration Camp hian kan in-unauna te,thian kan nihna angte hi thuk leh zuala vawng nungtu anih ngei a beisei thu a sawi a. Mizorama an cham chhunga an thil tawnhriat hrang hrangte chu vawng nunga, an chhungte leh thiante hnenah hrilh darh ngei turin a chah a. Camp hotuten India hmarchhaka camp buatsaih tawhah, tuna camp hi ala lian ber a ni tia an sawi chu a lawmawm hle a ni, Pu Lal Thanhawla chuan a ti a ni. Camp kharna inkhawm buatsaih hma hian Chief Minister hian State hrang hrang ten exhibition an pholante chu a en hmasa a ni.

Camp kharna inkhawm kaihruaitu Amar B.Chhetri, Asst. Director, Bharat Scouts & Guides, North Eastern Region chuan NIC thupui chu Remna Palai a ni tiin, India leh Pakistan inkara remna leh muanna a awm theih nan remna palaiah an tan tawh thu a sawi a. Kumin March thla khian Bharat Scouts & Guides in Pakistan an tlawh tur thu sawilang bawkin, hmanni ah Pakisten Scouts & Guides 100 rualin India an rawn tlawh thu a sawi tel bawk a ni.

Kharna inkhawmah hian state hrang hrang 9 in lam an entir a. Chief Minister hian camp hruaitute hnenah leh state tin palaite hnenah ngaihhruina thilpek a hlan a, Event Leader in ngaihhruina thilpek bawk Chief Minister hnenah hian a hlan ve bawk a ni.

NIC ah hian state 24 rawn telin, palai, staff member tiamin 426 an rawn tel a, camp chhung hian intihsiakna folk song ah te, state expositionah te, marriage of India, patriotic song te, state festivalte, folk dance, food plaza, leh state exhibition ah te an nei a ni.