1.       Kumin kum tir, January 26 khan RK Laxman chu kum 94 mi niin a thi a. India ram tan channa nasa tak a ni. Cartoonist ropui Laxman thih kum a nih vangin Press Council of India chuan kumina National Press Day thupui atan ‘cartoon leh caricature (lem-mawl leh lem tluang) hmanga thusawiin nghawng a neih dan’ zirho turin a rawn thlang a.  Nov. 16, (vawiin)-a Press Day hmang tura kan inbuatsaih mek laiin, tun Inrinni, Nov. 14 khan RK Laxman-a nupui pahnihna Kamala Laxman chu kum 88 mi niin a thi ve leh bawk a. He vanduaina avang hian kumina National Press Day hian ngaihven a hlawh deuh tura ngaih a ni.

Cartoon hrim hrim thawnthu hmasa lam han chhui zawk ila: Kum 1720-a William Hogarth-a’n British politics a corruption zungzam, lemziah hmanga a pholan atang khan political cartoon hian newspaper leh magazine-ah hmun pawimawh a chang zui tawh a. Lemziahna hmanrua te, a chhut chhuahna khawl te a changkan ang zelin a thang chho ve a ni. Ngaihdan leh thlirdan ziaka dah rem lutuk lo hi milem hmangin cartoon hian a pho chhuak thin a ni.  A chang chuan bias tak te, hriatthiamna tel miah loa a nihna ang taka lantirna te leh, hriam taka ngaihdan tihlanna te a tel fo thin. Thiam takin an duh lai tifiah turin milem an ziak a, chumi hmang chuan mipui ngaihdan chawh thawh an tum thin a, chu chu cartoon nihphung chu a ni a, ngaihdan pho chhuahna a nih avangin ‘editorial cantoon’ an ti deuh kher nghe nghe.

India rama cartoon zingah chuan RK Laxman-a’n a cartoon YOU SAY IT-a ‘common man’ hming a puttir, milem hmel chhe tak, kawr tial ha hian mipuite ngaihhlut leh ngaihsan a hlawh hle a ni. RK Laxman-a ‘common man’ hi editorial cartoon lar dang angin a hriam vut lem lo a, mahse Indian politics leh khawtlang nunphung nena hmehbel chi thu awmze nei tak tak a zep thin a. Common man chuan ngawi rengin ram chhunga politics che vel te, politician chet dan te leh khawtlang nunphungte a thlir thin a, ngaihdan awmze nei tak tak a rawn sawi chhuak thin a ni. Mizoramah chuan cartoon hi a nuihzatthlak chinah hian kan rekbung deuh ber a, hmun danga nghawng a neih ang hi a nei ve phak meuh lo niin a ngaih theih. Chuvangin chanchinbu mite pawh hian hmun danga an dah pawimawh angin cartoon hi kan leklam tam lo hle a ni.

Khawvel ram danga cartoon character zul zuiin, RK Laxman-a pawh hian kalphung mumal tak neiin a ‘common man’ hi a chet veltir thin. Common man chet vel dan atanga a miza nghet kan lo hmuhte chu -

Mi tu pawh, an lo zik chhuah dan leh an nihna behchhana thlir zawn dan (stereotype) hi RK Laxman a hmanraw pawimawh tak a ni. E.g. Bengali chu an phakar, politician chu an corrupt, etc

Common man-in a puanzar tawh chu a tanfung a nghet tawk (irony) thin. Puitling tak leh dik taka thlirna a nih vangin chhuahchhalh a tawh chang pawhin a duai zawkah a tang ngai lo.

A chang chuan hriatthiamna leh hawihhawmna tel miah loin tawngkam duhtui lo tak a hmang thin. Hetiang hi ‘satirical statement’ an ti mai a, Laxman-a comman man hian a hmang uar phian a ni.

Editorial cartoonist leh RK Laxman-a ngei pawhin hman an chin em em chu lemziak awmze neia tihhmelchhiat luih (distortion) hi a ni. Lem nalh takin ziak thei reng mah se, a duh lai tihchian nan ziah len luih emaw, ziah tet luih emaw, ziah chhiat luih emaw an ching em em. Lu ringawt lian lurh te, ban chauh sek tul te, kephah chauh hlai vakte hi, an sawi tum tihfiah nana awmze neia an ziah luih (distorted) a lo ni thin a, en thiam tan chuan a sawi tum a fiah duh hle a ni.

2.    RK Laxman-a ‘common man’ hi zir zui tur a tam khawp mai. Laxman-a hi lemziak thiam a ni ang tih a rinawm, mahse a hmanrua common man-a lem hi nalh thlurhin a ziak ngai lem lo. A common man hian hmel pangngai a pu zing em em a, a kawr tial hak hi a identity-ah a hmang lehnghal. Chhiartu tan ninawm viau tura ngaih ni mah se, thu awmze ril tak nei, sentence bung tak maia a han sawi thin hian bengkhawn a hlawh lo thei lo. A chang phei chuan word mal pakhat ringawt hi awmze nei takin a rawn pho chhuak thin. A chanchin an sawinaah chuan, Laxman-a hian he thu tawi te ziak tur hian darkar kua te a inkhung hrang thin an ti. Chuti chung chuan hlawhchham changte pawh a nei an ti leh zel. Mahse India ram ziarang leh ram hruaitute sukthlek hi common man-a sentence pakhat lek atangin a chhuidawn theih a,‘prophetic journalist’ tiin sawifiah ve ta ila, a thelh lutuk awm lo e. Chuti taka mi rinkai  nih hlawh tur chuan a hmanrua chu pencil mai a ni. A hnaa a inpekna leh a thawhrimna chuan Padma Bhushan te, Padma Vibhushan te, Ramon Magsaysay Award te hi a hlawh chhuak a, RK Laxman-a hretute chuan phu an ti hle a ni.

3.    Cartoon ziarang leh a nghawng kan zir ta mek mek, heti zawngte hian ngaihtuah ta ila. Keini Mizorama journalist-te hi, Laxman-a common man hian uluk takin min thlirin, kan lem min ziahsak ta se, eng hmel nge kan put ang? Kan mizia nena inmil eng thu nge min sawitir ang?

Reporter kan ni a, thil thar chanchin kan ziak thin. Report ziah kan inzirtir danah khan, zawhna paruk chhan tur zingah ‘WHO’ tih a tel kha. Chanchin thar hian kaihhnawih mihring a nei deuh zel. Kan report tam zawk phei hi chu mihring chanchin a ni. A report-tu lam nih hi chuan mi chanchin a chhia a tha ziah hi a lo awl viau mai. A ziaktu nih chuan eng he huah pawh kan ngai mang lo fo. Thil pawimawh tak kan hriat reng tur erawh a awm; Chanchinbuah hian kan chanchin hi a chhuan chhe zawngin lang ve ta se, eng angin nge kan dawnsawn ang? A tuang chhah lo pawl, dawh thei lo pawl kan lo ni mai ang em? Mahni kan inzawt fo tur a ni.Thu dik chu ziah tur, thil dik lo titu finfiah na na na chu thup a tul hran lo. Chuti chung chuan, tawngkam hman duh dan azirin, fiah tho si, dawnsawn nuam deuh hi chu a awm. Mi chanchin kan ziahin, mahni inchan thin ila, a awm tawk chu a lo lang mai thin. Kan source-te an lo extreme deuh a nih pawhin, dawnsawn dan tawk leh thehdarh tur chin tawk thlitfim ngam a tha. Pa extreme deuhte fuih nazawngah journalist puitling chu pawrh hauh loh tur. News te, editorial-te hi thinrim chunga ziah chi a ni lo a, thinrim hrikthlak nan chanchinbu hi hman hauh loh tur a ni. Chanchinbu leh kan news report chuan eng emaw ti zawng talin a tha zawnga laklawn tlak (creativity) a nei tur a ni. I hlimthla tilang thei Cartoon siahsak che se, i zak ang nge i chhuang ang? Keimahni theuh i inzawt ang u.

4.    Mizote tawng tualleng lar tak pakhat chu, "Pa remhre lo pa tal hah" tih a ni. He tawngkam hian Mizote hi min hruai sual nasa hlein a hriat. Hah te, rim taka thawhte hi remhre lo thuamhnaw anga ngaihna a hring a, awlsam taka hlawkna hmuh hi finthlak niin kan inzirtir phah. Hah loa hlawk tumna kawngah min hruai a, balhla huan lama tuthlawh put liam aiin Bhavan/Hnam Run vela han lam vir chui chui a, minister bathlara work order nghah kha remhriat thlak hleah kan ngai niin a lang. Chu aia hahdam kan dap zui zel a, khati em ema chiahpuam kan buaipui te kha, hahdam taka hlawk tumna mai a ni. Pumpelh kawng zawha hlawk tum nak alaiin, an kawng zawh kual thui tawhzia hi, an zawh chhuak dawn em tih pawh a chiang lo telh telh lehnghal. Vanduaina tawk tate an lainatawm a, an sum hloh zozai kha, chhelna leh taimakna lei chhuahna atan tal hmang teh ila aw!

5.    Hlawhtlinpui atan chuan, finna te, remhriatnate ai hian, taimakna te, tumruhnate hi a rintlak zawk a, a tlo zawk bawk. Rinawm taka thawkrimte an zik a ngil leh thin. Compensation thang kam thiam riaute chu mi remhriaah kan ngai a, hahdam taka kan hlawkpui theih dawn chuan BPL nih pawh kan zak ta meuh lo. He thlarau hian keini journalist-te hi chu min man ve lul suh se. News reporter ni chungin publisher kan ni kawp fur hlawm. Keini khaw tiat mi ramah pawh an ni ve tho. Small newspaper reng reng chu advertisement tel loin a nung zo lo, chu chu ram changkangah pawh thu dik a ni. Hei hi erawh ka inzawt duh, news zawn nan nge hun kan hman tam zawk ang advertisement zawn nan? Advertisement hi a vantla a vang khawp mai. News tha phenah a biru zo deuh vek a ni. News tha hai chhuak hmasa ila, advertisement pawh kan hai baw tel ang. Mizo upain ‘Lung rit tak hnuaia chakai chu a thau bik’ an lo ti ngai. Li thuk sangha chu a lian nge nge.

Hlawhtlinna chu Pathian malsawmna a ni teh meuh mai. Malsawmtu hian dingdihlipa kan ban phak loh chiah chiahah hian malsawmna hi a khai a ni awm e, malsawmna dawng tur chuan thlan tla phunga zuan a ngai fo thin. Zuan phak loh khawpa sangah erawh a khai ngai lo. Tun hnaiah kan thian thenkhatin sorkar Flagship programme NLUP atangin chhawmdawlna kan dawng hlawm a, a lawmawm e. Trade zingah Destop Publishing a lo awm hlauh a, a dawng awm tak pawh kan ni mai thei. Hei hi erawh ka inchah duh; journalist kan ni a, chhawmdawlna kan dawn chu a purpose dik takah kan hmang tur a ni ang. Media leh hlemhlet a inrem lo a, reporter nih leh dawt sawihmang nih a inrem hek lo.

KEIMAHNI

Remchang lain keimahni huang chhung han fang thuak thuak ila.

Mizorama journalist-ten hneh taka min fun khawmtu pawl Mizoram Journalists Association kan nei hi kan vannei khawp mai. Kan mi hmasaten MJA an lo din hlauh a, kalphung fel leh khauh tak tak min hnutchhiah hi journalist tam tak hi chuan kan dam khawchhuah phah a, mimala zahawm zo lo kha MJA thlazar hnuaiah zahawmin kan awm a ni. District tina mite nen danpui pakhat chhunga kan awmte hi a mawi a, Mizo hnam rohlu zinga mi a tling a, kan inthlun khawmna hrui hi kan suih nghet sauh sauh tur a ni. He kan pawl hi kan kawr a ni a, kan mawina a ni. A  tihmelhem zawng emaw, a tibawrhbang zawng emaw, a tipherh zawng emawa kan khawsak chuan, thil atthlak tak kan ti tihna a ni a, mahni thlan lai ang hial kan ni ang.

Inkaihhruaina dan kan nei a, keimahni leh kan pawl humhalha veng him turin hruaitute kan thlang thin. Chu chu keimahni rel a ni. Pawl hruaitu atan keimahni zinga rual u deuh kan thlan chang a awm a, thalai zuan zang zawk kan thlan chang a awm. Pawl hruaitu atana kan mi thlanchhuahte zahder nachang kan hriat hian, min tuamtu he pawl hi kan chei mawi tihna a ni a, keimahni ngei hian kan mawi phah a ni tih hriat a tha. Kan lo thlang fuh lo deuh a nih pawhin, an term chhung na na na chuan hotu ena kan en hi kan tih makmawh a ni. Kan mit an tlung lo a nih chuan kan thlak leh mai zawk tur a ni.

Hruaitu thlan boruak kan tuipui ta lutuk erawh hi chu journalist-te hi chuan kan inhmeh lo khawp mai. Pawl hriselna te, pawl mawinate kan tihmelhem palh ang tih a hlauh awm e. Hruaitu nih kan inchuhna lamah he pawl zahawm tak hian mi nuihzat kan hlawh palh hlauh ang e. Pawlin a zahawmna a hloh tawh chuan, engti zawng mahin chu pawl hruaitu chu mi zahawm a ni thei lo. Term dinglai a tawp hnai a, kumtharah hruaitu thlang turin kan inbuatsaih leh ang. Chutih hunah chuan, hruaitu nih tumte leh member-ten hei hi i hre thar ang u, hruaitu nih duh vang emaw, kan duhzawng thlan tlin tum luat vang emawin he pawl hi i tibawrhbang lo hram ang u.

KA LAWM E