Thian te u, chibai vek u le,
He hun lawmawm tak, kan ram tan a Republic Day champha phak vawi 67-na ni ah hian he lai hmun a lo pungkhawm zawng zawng te leh Mizoram mipui te lawmpuina kumthar chibai leh duhsakna sangber ka hlan a che u a ni. Kan tana ni pawimawh danglam bik ah hian zalenna min sual chhuah saka, zahawmna min pe a, danbu min buatsaih saktu, kan pi leh pu te inpekna ropui tak kha hre thar leh ila. He ram ropui tak ah hian, khua leh tui tha tak kan nih angin he ram inrelbawlna danpui venghimtu, ti chaktu leh dan zawmtu nih theuh i tum ang u.
He ni pawimawh takah hian Mizoram in kum liam ta a hlawhtlinna a neih tam tak zinga a langsar zual te tarlan tha in ka hri a.
1. Ram ralmuanna, dik taka dan leh hrai lekkawhna bakah mipui - vantlang tan himna neih hi kan zavai a tana pawimawh hmasaber a ni a. State ralmuang ber kan nih theihna atana theihpatawpa sawrkar thlawpna pe thin tu, tlawmngai pawl hrang leh kohhranmi te chungah thinlung takin lawmthu ka sawi a ni. Min venghimtu Police te pawh an mamawh hmanraw pawimawh tak tak leh ralthuam tunlai ber ber a thuam that mek zel an ni a. Aizawl City Surveilance Project pawimawh tak pawh tha takin peih fel a nih tawh bakah he project thawh hnihna, Aizawl khawpui hmun tin tuamchhuak vek tur tunah hian chak tak in kan kal pui mek a. CCTNS Network hmanga Police Station zawng zawng thlunzawm hna pawh thawhzawh thawkhat ni tawh in a hmawr bawk chiah kan hmabak a ni tawh a ni.
2. Mizoram mipui tam tak tana eizawnna ngelnghet siam saka, an sum leh pai dinhmun thlenga tiphuisui mektu, kan flagship programme, New Land Use Policy (NLUP) pawh chak takin kan kalpui mek a. April 1, 2015 atanga chhiarin kum 5 chhung atan pawhsei a ni leh tawh a ni. Kan state in sum leh pai a thawhchhuah zawng zawng te punna chu 8.45% a ni a. Hei hi India ram pumpui huap aiin a tha zawk a ni tih The Mizoram Economic Survey, 2014 - 2015 a tarlang a. Thil lawmawm tak a ni. Ramngaw ti chereu thin tu, thingtlang loneih pawh 21% laiin a tlahniam a, he thil lawmawm tak hi NLUP hmalakna kaihhnawih leh a hlawhtlinna tichiangtu ni in ka hria.
3. Kan sawrkar hian inkalpawhna kawngpui enkawl leh siamthat a ngai pawimawh hle a. Sawkar kum, 2015-16 chhung in National Highway 54 chu Double Lane ah siam a ni a, Kawngpui 79, a sei zawng belhkhawm KM 1885 zet a thui pawh tunah hian siam leh mek a ni. Km 99.83 zeta thui, Kaladan Multi Modal Transit Transport Project (KMMTTP) siam hna pawh chak taka thawh mek a ni a. Kawng kan neih mek te tha taka enkawl zel kan tum bakah Lengpui Airport tih changtlun hna kan thawh mek pawh hi peih fel thuai a ni ang.
4. Kawlphetha chakna siamchhuah kawngah kan state sawrkar hian intodelh bakah hralh chhuah tham siamchhuah kan tum a. Kan luiluang tam tak, kawlphetha siamchhuak thei te pawh zir chian mek zel niin he mi kawngah hian kan sawrkar chuan company lian tak tak a dawr fel tawh a ni. Tuivai Hydro Electric Project (210 MW) siam turin North Eastern Electric Power Corporation (NEEPCO) nen thawhhona thuthlung kan ziak fel tawh a, lehkha pawimawh tlemte chinfel tur te tihfel a nih hunah he project hi tan a ni ang. Kumin chhunga hman theih turin 60 MW pechhuak thei Tuirial Hydro Electric Project pawh NEEPCO in chak takin a thawk mek a. Thawva Small Hydel Project (5 MW), Kawlbem Small Hydel Project (3.5 MW), Tuiriza(100 KW) leh Tuiching Small Hydel Projects (100 KW) te pawh kum 2017 chhunga hman theih beisei a ni a. Nizung chakna te pawh nasa zawka seng a nih theih nan hma kan la mek bawk a ni.
5. State mipui te tana tuithianghlim chhawpchhuah hi kan sawrkar intiamkam-na a nih avangin PHE Department chuan theihtawp a chhuah a. Kum 2015-16 chhung ngeiin thingtlang khaw 42 ah National Rural Drinking Water Programme (NRDWP) kaltlang a tuithianghlim sem hman kan inbeisei a ni. Heng bak ah hian Water Supply Schemes projects 21 lai chu Non-Lapsable Central Pool of Resources (NLCPR), 10% Lumpsum Grant leh North Eastern Council (NEC) atanga hnathawhna sum hmuh tawh te hmang in peih fel thawkhat a ni tawh bawk.
Ram pumpui huap Flagship Programme, Swachh Bharat Mission hi kan tuipui in kan ngai pawimawh em em a. Swachh Bharat Mission (Gramin) hnuaiah mimal, vantlang leh zirna in te tan zunram thiarna siam niin khawpui bakah thingtlang khawlian deuh te tan bawlhhlawh sakhat chi zawng zawng sawngbawlna tur project kan thawk leh mek bawk a ni.
6. Kan sawrkar chuan mi rethei leh khawsak harsa deuh chhungkaw tam tak tan chenna in buatsaih sak leh an mamawh zual deuh te phuhruk hna Aizawl khawpui hmun hrang hrang ah a kalpui mek a. He project hi JNNURM hnuaia thawh niin thawh zawh a nih hun chuan khawpui chhunga mi khawsak harsa zual, chhungkaw 1,096 lai ten chenna in anmahni pual in an nei tawh dawn a ni. Slum area, khawpui leh thingtlang khawlian deuh zawk te tih hmasawn hna pawh 10% Lumpsum Grant kaltlang in kan thawk chhunzawl zel bawk a ni.
7. Kan sawrkar hian thingtlang a cheng mi rethei te leh khawsak harsa zawk te chawikan hi a dah pawimawh hmasa a ni tih in hriat ka duh a. Mahatma Gandhi National Rural Employment Gurantee Scheme (MGNREGS) hnuaiah inhlawhna buatsaih sakin Indira Awaaz Yojana (IAY), National Rural Livelihoods Mission (NRLM), Pradhan Mantri Krishi Sinchayee Yojana (PMKSY) leh Border Area Development Programme (BADP) hmalakna atang te in an tan a hamthatna siam sak a ni.
8. Kan sawrkar hian buh leh bala intodelh hi a thupui ber a nih piah lamah eizawnna ngelnghet kan neih theih nana thil pawimawh ber pakhat a ni tih a hria a. Kan buh thar chhuah te ti pung turin tunlai thiamna rintlak tak tak : System of Rice Intensification (SRI), Line Planting leh tlang pang a buhhmun neih dan hlawk thlak zawk te loneitu te zirtir in kan mithiam ten theih tawp an chhuah mek a ni. Loneitute tan khawl, hmanrua leh bungraw mamawh chi hrang hrang te pawh man tlawm zawk a pe chhuak in van ruahtui khawlna tur tuizem chi hrang hrang pawh siam sak an ni tawh a ni.
9. Damlo enkawlna man tlawm zawk, damdawi leh damlo enkawlna senso tlem zawk mipui te tan buatsaih sak turin nasa takin tan kan la mek zel a. State Referral Hospital, Falkawn ah Mizoram Institute of Medical Education & Research (MIMER) din a nih theih nan chak takin hma kan la chhunzawm zel a. Mizoram State Cancer Institute, Zemabawk a kan neih mek hi khum 100 awmna Cancer Hospital ah siam tum in sawkar chuan ruahmanna a siam mek bawk a ni. Khum 200 awm theihna tur a lian, Mizoram College of Nursing, Falkawn ah sak hna thawh mek ni in khum 50 awm theihna AYUSH Hospital, Thenzawl phei chu sak zawh tep a ni tawh a ni. District zawng zawngah khum 10 awm theihna tur Ayush Hospital sak a ni theih nan hmalak a ni a, natna chi hrang hrang Tuberculosis, sikserh, Mitdel natna leh phar natna te tih ziaawm a nih theih nan Health Department hnuaiah chak takin programme hrang hrang kalpui a ni bawk a ni. State pumpui ah Rashtriya Bal Swasthya Karyakran (RBSK) kalpui a ni a, Anganwadi Centres, Govt. Schools leh Govt. Aided School zawng zawngah sikul naupang te hriselna dinhmun enfiah hna Mobile Health Team ten an nei thin a ni. District 5, Champhai, Mamit, Lawngtlai, Lunglei leh Saiha ah Rashtriya Kishor Swasthya Karyakram (RKSK) hmalakna kal pui tawh niin zu ngawl vei leh ruihhlo ngai te chhanchhuah hna thawh kan sawrkar hian a dah pawimawh tak zet bawk a ni.
10. Sawrkar tan Human Development tih hmasawn hi thil pawimawh ber te zinga mi a ni chhunzawm zel a. Khaw 66 ah Early Childhood care and Education (ECCE) changtlung takin kan kalpui tawh a, Department of School Education leh Tata Institute of Social Sciences, Mumbai te pawn thawhhona thuthlung ziakin High School 200 thlan chhuah ah te Connected Learning Initiative (CLI) kalpui a ni tawh a. CLI kaltlang hian Sikul naupang te chu an hmalam hunah zirna tha zawk an neih theih nan leh eizawnna thlan tur bik an hriat theih nan zirtirna pek an ni. Ziak leh chhiarah India rama dinhmun sang ber hauh tum in Mizoram pumpuiah total literacy drive kalpui mek a ni a, Lawngtlai, Mamit leh Lunglei District ah te ngawrh leh zuala kalpui a ni. Rastrya Madhyamik Shiksha Abhiyan (RMSA) leh Sharva Shiksha Abhiyan (SSA) hnuaia hmalakna hrang hrang te pawh tun thleng in tha taka la kalpui mek zel a ni bawk a ni.
Rastriya Uchchatar Shiksha Abhiyan (RUSA) hmalakna hnuaia College 21 tih changtlun, Govt. Zirtiri Residential College leh Govt. Hrangbana College te Model Degree Colleges a hlan chhoh bak ah Mizoram Engineering College, Pukpui, Lunglei hmun ah te siam rawtna chu Ministry of Human Resources Development, Govt. of India chuan a pawm tawh a ni.
11. Kan state chhungah ei leh bar chungchangah mipui te kan lungmuan theih nan sawrkar chuan theih tawp chhuah in rual khai zawk a buhfai leh eitur mipui te hnena sem hna felfai takin a kalpui thei a. Ration Card zawng zawng computer ah felfai taka chhinchhiah vek tawh in buhfai leh eitur felfai takin mipui hnenah sem a ni thei tawh dawn a, a lawmawm hle a ni.
Eirelna boruakalhthei(LPG) indaihloh leh van na chhan zawng chhuakin sawrkar chuan LPG dan lova hralh, pawlh dal leh chheprelh ti tawp in LPG a hrasatna zualpui chu sutkian tawh a ni. Department of Food, Civil Supplies & Consumer Affairs chuan Indian Oil Corporation Ltd. thawhpui mek in tunah hian 5 Mega Tonne thun theihna tur Gas Bottling Plant, Tuialhthei leh a kaihhnawih dahkhawlna hmun te siam a nih theih nan hma lak mek niin Food Security Act, 2013 kan hman thuai theihnan sawrkar in thapui a thawh mek bawk a ni.
12. Inkalpawh tawnna, inbiak pawhna leh inthlun zawmna pawimawh chi hrang hrang te hi ram hmasawnna, sum leh pai bak ah ei leh bar kawnga kan dinhmun chawikang tura kan mamawh hmasak an ni a. Kan "Act East Policy" innghahna lungphum pawimawh tak pawh a ni nghal a ni. Hmasawnna kawngah nasa takin Mizoram in ke a pen mek a. 100 Km a thui, Kaladan Multi Modal Transit Project pawh chak taka thawh mek niin hun reilote ah ‘Act East Policy’ chu a tak ram a rawn chang chho dawn a. Hmana Outpost ni thin kha “Gateway of India” ah inthlak thawkin Mizoram hian sumdawnna kawngah South East Asia ram te rawn luhna tur kawngkhar a hawnsak dawn a ni. Pi Nirmala Sitharaman, Hon’ble Union Minister of State (Independent charge), Ministry of Commerce & Industry in kum in March 25, 2015 a a rawn hawn tak, The Land Customs Station, Zokhawthar chuan nasa takin Myanmar leh India insumdawn tawnna tunah pawh a tipung hial tawh a. Land Custom Station (LCS), Zorinpui, Lawngtlai District sak hna pawh ngawrh taka kal pui mekin hun reilote chhhunga thawh zawh hman kan beisei a ni.
13. Hmasawnna ruhrel din kawngah sawrkar in theih tawp a chhuah mek a, Industry hrang hrang leh thil siamchhuahna tenau dinna tur hmunhma atan Zuangtui Industrial Area Industrial Plots 25 pek ni tawh in Export Promotion Industrial Park , Lengte ah Indutrial Units 10 atan ram ruahman a ni tawh a. Mizoram Ispat Industry leh Chinzah Enterprises, Lengte te chuan hralhtur bungrua an siam chhuak tan der tawh a; Food Processing Unit 3 pawhin hun reilote chhungin sumdawnna an tan thei dawn bawk a, a lawmawm hle mai. Bamboo Sector Development, Electronics & IT Sector, Handloom & Handicrafts leh Skill Development Training bikah te hmalakna tam zawk a awm theih nan sawrkarin tan nasa tak in a la mek a. Skill Development Centre, Lunglei leh Mizoram Handloom Export Facilitation Hub, Thenzawl sak hna thawh tan a ni tawh a, Luangmual ram chhunga Weavers’ Service Centre sak mek pawh chak taka kalpui mek a ni bawk. Oil & Natural Gas Commission (ONGC) leh Oil India Limited (OIL) company te chuan Mizoram chhunga tuialhthei leh boruakalhthei zawn hna ngawrh takin an thawk mek a. Chuvang chuan he kan hun tawn meka kan zawm atana pawimawh ber leh kan thupui tur chu Prime Minister Pu Narendra Modi'an India ram hmasawnna atana Rampum huap thupui atana a thlan, “India, bul tan rawh” tih leh “India, mahni kutke in dingchhuak rawh” tih thu awmze tak te hi a ni a. Mahni kutke a din chhuah tum in mahni thahnem ngaihna a bul tan in Mizo thalai ten hma thar kan lak a ngai a ni. Mizo thalai te hi "hnazawng" ni lovin "hna siamtu" ni thei khawp a theihna nei an ni tih ka chiang em em a ni.
14. Mizoram hian ruahmanna fumfe tak nen awmze nei takin ramngaw tha tak kan neih theih nan hmalakna chi hrang hrang kan kalpui mek a. National Afforestation Programme (NAP) hmalakna hnuaia khaw tin a Village Forest Development Committee te thingphun tawh zawng zawng belhkhawm hian 62,625 Ha a zau hmun a luah khat tawh a ni. Green Mizoram Programme hnuaiah tun thlengin thing tiak nuai 36 lai phun ni tawh in National Agro-Forestry & Bamboo Mission (NABM) hnuai ah ramruak leh hnim awmna hmun 60,000 Ha a zauvah mau phun a ni tawh a. Kan hmalakna avang hian Central sawrkar ah pawh kan state ang ramngaw enkawl tha te tihphur nan tanpuina sum leh pai a duhsakna kan phut ngam hial tawh a ni.
15. Infiammite tana hmunhma leh hmanraw tha ber ber siam sak a, thalaite tan khawvel thar siam sak hi kan sawrkar intiamna a ni a. He mi kawng ah hian sawrkar in a tihtur tha taka a hlen avangin hlawhtlinna duhawm tak kan tem chho tan der tawh a. Tun ah pawh kan thalai te hlawhtlinna nasa tak hmuhtur a awm tawh a : Kum 2014-2015 chhung khan National Level intihsiakna ah Gold Medal 50, Silver Medal 55 leh Bronze Medal 76 kan thalai ten an hlawhchhuak a. Mizoram Under-14 Football Team phei chuan Kum 2015 Subroto Cup International Tournament ah Champion in Mizoram ah Champion No Mawi an rawn hawn hial a ni.
16. Mizoram sawrkar chuan pianphunga rualbanlo te, hmeithai, kum upa chak tawhlo, fahrah, natna benvawn neih vanga hnathawk theilo leh mi chanhai te hma khua ngai in an hamthatna tur kawng hrang hrang a siam sak thin a. Hmeichhia leh naupangte chhawmdawl leh tihhmasawnna programme a kalpui a. Sum leh pai dinhmun bakah rualbanlo leh tanpui ngai bikte inenkawlna te tur a ngaihtuahsak thin a ni. Ruihhlo hmansual, zu ngawl vei vanga buai leh kumtlinglo pawikhawih thin ten kawng dik an zawh theih leh na tura tanpui bakah hmeichhia leh naupangte hralh leh an chunga hleilenna te ti bo turin kan sawrkar in a theihna zawng zawng a hmang thin bawk a ni.
17. E-Development huang chhunga Mizoram tih hmasawn hi sawrkar tih changtlunna leh vantlang tih hmasawnna a ni tih hria in hemi kawngah pawh hian phur takin hma kan la mek zel a. E-Development hian sawrkar langtlang, sumdawnna awlsawm zawk leh hamthatna dang te min siam sak dawn a ni. July 1 atanga July 7,2015 chhung khan Digital India Week hmannna kan nei a, he hunah hian e-Services and Software hrang hrang te kan tlangzarh a ni.
18. Kan state hi khualzinmi te tlawh chak ni tur in sawrkar in a buatsaih tan a. Adventure Tourism, Rural Tourism leh Eco-Tourism ah te Mizoram hian hlawhtlinna a hmu thei tih zirchian a ni tawh a, hun reilo te chhungin India Tourist Map ah Mizoram hi a chuang vang tawh dawn a ni.
19. Mipui te tan a thawk Sawrkar tha leh rinngam kan neih theihna tur in theih pa tawp in eirukna leh hlemhletna do in kan penchhuak a ni tih in hriat ka duh a. Kan hmanrua atan a pawimawh em em tur, Lokayukta Bill, 2014 pawh Mizoram Legislative Assembly in a pawm tawh a, hun rei lote ah Lokayukta hi kan nei dawn a ni.
20. A tawp berah chuan kan Mizoram mipui ten beng lo khawn lehzual se ka duh chu Mizoram leh Himalaya tlang bul thut a awm state zawng zawng te hi khuarel chhiatrupna chi hrang hrang lakah kan him lo mai ni lovin kan dinhmun a thlamuan awm lem lova. Hmanni a Manipur a chhiatna lo thleng ang leh a aia nasa zawk pawh kan tawk thei a ni tih hi chiang ila, Sawrkar in mipui te disaster drill chungchang a zitirna a pek te hi thlir liam lovin ngaihven thin ang u. Sawrkar in kan him tlan zawkna tura insak kalphung a siam te hi kan thatna tur a ni tih hria in zawm tlat i tum ang u. Mahni sahimna kawng ngaihtuah chungin mi dang te tanpui leh chhanchhuah dan pawh kan zir tel a ngai a. Chu chu ‘Smart City’ Mission for Aizawl atan a kan lo inbuatsaih lawkna pawh a ni thei ang.
Ka thusawi tih tawp nan NGO hrang hrang, Kohhran te, media leh mipui vantlang chungah lawmthu ka sawi a. Theihtawp in sawrkar hmalakna te thlawp in Mizoram hmasawn nan sawrkar in thawhpui reng tih ka hmuh hian ropui ka ti a, he tanrualna hi kan state chakna hnar chu a ni.
Parade contingents, zirlai te leh mipui lo pung khawm zawng zawng te pawh in ti tha ka ti tak zet e. In mi thlawpna duhawm tak leh sawrkar laipui in thurual pui tih ka hmuh avang hian kan state sawrkar hian mipui te hnenah a thutiam a hlen ngei in ka ring a, a hmachawp tihlawhtling in a tum ram a thleng ngei bawk in ka ring a ni.
Vawiin ah hian kan za in kan ram ropui tak chhungah hian kan inpumkhatna ti nghet zel a, venghim bawk turin inhlan thar leh theuh ila. Mizoram hi ram nuam, ram hausa, ram ralmuang, zahawmna leh hlimna nena kan khawsakna hmun atana siam tur in hmalam pan in i pen chhuak ang u.
A tawp ber ah chuan Mahatma Gandhi thusawi ropui tak hi kan rilru hawng zau tu atan leh kan ngaihtuah chhunzawm atan ka han sawichhawng a nge:
“Ka run in mawi chuan bang leh kawngkhar te nei lo se. Hnam tin chi tin te nunphung leh kalsiam te chuan chhemdam thlifim iang in min chhem ang a. Kei zawng thlifim na zawng chhem a’n ka nghing mawlh lo’ng e. Leng dang te run mawi ah chhiahhlawh, kutdawh leh lawm loh inleng ianga sial ang lawi luh ka tawn an a mawi si lo”
KALOME!
