Vawiin khan I & PR Auditorium-ah I & PR Department leh Mizoram Journalist Association (Hqrs) te chuan National Press Day 2015 an hmang. Pi Thanhliri Pachuau, Secretary I & PR Department in a hmanpui a ni.

India rama chanchinbu mite zalenna leh pawimawhzia tilangtu chanchinbu thiltithei tak hian a mawhphurhna hlenchhuak tur te, nawrna leh vauna avanga an buai mai lohna tura Press Council of India in hna a thawh tan ni a ni tih sawiin khuallian Pi Thanhliri chuan November 16,1966 khan Press Council of India din a lo nih dan leh chanchinbu mite zalenna leh mawhphurhna sanzia hria in National Press Day hi hlut tur a ni a ti a. Media ten hlauhna leh duhsak bik na tel lova an tih tur an tih theih nan PCI chuan Print Journalist te tan bik National Award chi hrang hrang a siam a. India ramin Journalist a neih ropui ber zing a mi, Raja Ram Mohan Roy hming chawiin Raja Ram Mohan Roy National Award for Excellence in Journalism a siam chuan Citation, Plaque leh sum Rs. 1,00,000/-(cheng nuai khat) a keng tel a. Hei bakah hian Rural Development Reporting, Investigative Journalism, Photo-Journalism leh Best Newspaper Art ah te Award siamin Plaque, Citation leh pawisa fai Rs. 50,000/-(Cheng singnga) a keng tel bawk a ni a ti.

National Press Day hi kum 1997 atangin kumtin thupui hrang hrang neia hman thin a ni a, kumin 2015 atana thupui thlan chu “The Impact and Import of Cartooning and Caricature as a medium of Expression of opinion” tih a ni. Thu thehdarhtu te hian kan hnamzia (culture) vawnhimna kawngah pawh mawhphurhna thui tak kan nei a ni tiin Khuallian chuan tawngkam hman dan leh ziak dik chungchang ah midangte zirtirtu an ni tih hria a tawngkam hmang fimkhur chanchinbumi te chu a chah a ni.

Pu Jim K Chozah, Director I & PR kaihhruai vawiina National Press Day hmanna ah hian Pu Vanlalrema Vantawl President, MJA in Keynote address a sawi a. Kan kutah thil tih theihna a tam poh leh kan mawhphurhna a sang a, kan hna piah lamah hian inthununna, insumtheihna, hun hman dik a tel vek a ni a ti a. Eizawnna hmun khat, rilru hmun khat pu a inhrethiama thawhho a ngai a ni a ti bawk.

Pu K. Sapdanga, Ex President, MJA in paper a buatsaih chu ngaihthlak ho a ni a. Kumin National Press Day ah hian thupui a tan Cartoon leh kawh nei lem hmanga thusawi chu thupui anih angin cartoon ah hian thil chiang lo sawi tir tur a ni lova, belhchiah a dawl tur a ni, a ti. Chanchinbumite hian News leh Editorial an ziah lai ten thinrim chung leh ngaihdan nei sa ul in ziah loh tur a ni a, hlemhletna leh dawt sawi pawh a in rem lo. Chanchinbumi kan nihna ah hian mimala zahawm zo lo te MJA te thlazar hnuaiah chuan an zahawm ve a ni, tiin lungrual taka insuihkhawma thawkho zel turin a sawm a ni.

Vawiin National Press Day hmanna ah hian I & PR leh chanchinbumi te an tel tha hle a, hun tawp lamah sawihona hun tha tak neih zui nghal a ni.