2795/2023-2024

Aizawl 16th November, 2023 : Vawiin khan I&PR Auditorium, Treasury Square-ah I&PR Department leh MJA, General Headquarters tangkawpin an huaihawt National Press Day, 2023 hman a ni a. Pu C. Lalnunkima, Director, I&PR chuan he hun hi a kaihruai.

He hunah hian Pu V. Ruatsanga, Addl. Secretary, I&PR leh Pu C. Lalrambuatsaiha, President, MJA te'n thu sawiin thutharthehdarhtute tana hriat tur leh zawm tur pawimawh hrang hrangte an sawi bakah thawhhona leh inpumkhatna tha awm zel se an duh thu an sawi a. Ethical Journalism, hnam leh hnam innghirnghona awm lova, mipui tan a thleibik nei lo leh thudik bengvarthlak chauh chhuah thin turin kalkawmte chu an chah a ni. Democracy ramah Media te chu fourth estate/pillar an nih ang ngeiin kumin election nei zawh takah pawh khan mipuite hriat tur zirtirna leh puanchhuah kawngah an thawhhlawk hle a ni tiin Additional Secretary I&PR, Pu V. Ruatsanga chuan MJA-te chungah lawmthu a sawi nghal bawk a ni.

National Press Day hi Kum 1966 Press Council of India din cham atanga hman tan niin Press mite zalenna, hamthatna, mawhphurhna leh hmasawna atana hman thin a ni.

Pi Esther Lalremruati, Scientist, MIRSAC chuan kumin National Press Day thupui 'Media in an Era of Artificial Intelligence' tih hmangin zirtirna a pe a. A paper present hi sawihona leh zawhna leh chhanna neih chhunzawm nghal a ni bawk.

National Press Day hmanna hunah hian Pi P.B Lianthangpuii, Jt. Director, I&PR chuan lawmthu sawiin Pu K. Lalhmuakliana Dy. Secretary, I&PR chuan he hun hi a hmanpui bawk a. MJA Member leh Media dangte bakah I&PR Department chhunga Officer leh Staff-te National Press Day-ah hian an tel a ni.