2794/2023-2024

2023 Sahmulphah thla ni 16: Vawiin chawhma dar 11:00 khan Mizoram Journalists' Association (MJA), Kolasib District te chuan Kolasib Press Club-ah 'National Press Day' an hmang a. Kolasib District Information & Public Relations Officer Pu C. Lalhruaitluanga'n hun a hmanpui.

He hun hi MJA Kolasib District President Pu Andrew Vanlalauva chuan kaihruaiin, inlawmna thu a sawi bakah, National Press Day ṭobul leh MJA Kolasib District te'n National Press Day an lo hman tawh ṭhin dan a tar lang a. Resource person, Kolasib DIPRO Pu C. Lalhruaitluanga chuan kumin NPD thupui atana thlan, "Media in an Era of Artificial Intelligence" tih hmangin thu a sawi a. Artificial Intelligence (AI) lo ṭhan chhoh zel dan tar langin, tunlai khawvelah khawlin mihringte min thunun tawh zawk a, he hun (era)-a media-te kal zel dan tur leh hmasawn zel dan tur kan ngaihtuah a ngai a ni, a ti.

Kolasib DIPRO chuan media hmasawnna kal zelah print leh electronic media piah lamah 'new media' kan tih, 'social media' chu nasa taka rawn larin, hei hi media huanga AI rawn inrawlh chhohna a tih theih a; eng tikah emaw chuan print leh electronic media te hi a la lem zo mai ang tih hlauhawm a ni tawh, a ti a. Social media-ah chuan news a chak a, kan mamawh loh thleng thlengin thu thar kan hre ta a; AI nena an ṭan kawp hnuah phei chuan kan ngaihtuah phak bakin media kalphung a rawn khawih danglam chho mek a ni, a ti a. Tunlai khawvelah media liante'n AI hmangin article leh news te an puah tawh tih sawiin, news khawn khawm tur te, thu belh chian dawl lo leh dik lo (fake news/misinformation) thliartuah te a ṭha zawnga kan hman theih laiin, AI hian mihring hna thawh tur tam tak, mihring aia chak leh dika a thawh theih avangin mihring tan hna a vang chho zel a, media lamah pawh hei hi a thleng chho ve thei a ni, a ti a. AI chu siam chawp finna a nih avangin mihring angin ngaihtuahna fim a nei ve lo a, a data hmuh apiang kha a ṭhat leh ṭhat loh te, a dik leh dik loh te pawh thliar lovin a la khawm mai ṭhin a, chu chu phuah khawmin, news ṭha lo tam tak a siam thei bawk a ni, a ti.

Pu C. Lalhruaitluanga chuan media hian khawvel changkan ruala hma a sawn ve zel a ṭul angin, AI-in hmasawnna a rawn kente pawh media mite'n a ṭha zawnga kan hman a, ṭan kan lo lak a ngai a ni, a ti a. AI kan hmang a nih pawhin journalist ethic vawng reng chungin, kan pian chhuahna kalsan lo leh a ṭha lai chauh seng lut tura kan hman thiam a pawimawh a ni, a ti a. Media zalenna leh mihring hlutna tibuai si lova AI hman thiam zir turin MJA Kolasib District member-te chu a chah a ni.

Hemi hnu hian MJA Kolasib District member-te aṭangin NPD thupui sawi hona hun hlawkthlak tak hman zui a ni a. MJA Kolasib District General Secretary Pu Zairemchhunga chuan lawm thu sawiin hun a khar a ni.

National Press Day hi November ni 16, 1966-a din, ram pum huapa media-te thlung khawmtu Press Council of India (PCI) din ni pualin kum tin hman ṭhin a ni a. Kum tin thupui neiin, media-te ṭhan chhoh zel dan tur leh hmasawnna tur te, ram rawngbawlna kawnga media-te'n hlawk zawka tha an thawh theih dan tur te zir ho nan hman ṭhin a ni.