India rampuma chanchinbumite intelkhawmna lian ber Press Council of India duh dan angin National Press Day chu vawiin khan I & PR Auditorium-ah I&PR department buatsaihin MJA General Hqrs. te chuan an hmang a, Mizoram Chief Secretary Pu Vanhela Pachuau chuan nilengin he hun hi a hmanpui a ni.

 

Inkhawm tanna hun chu I & PR Secretary Pu Nghaklianmawian a kaihruai a. Chief Secretary chuan chanchinbumite chu khawtlang mimir nun chhertu leh kaihruaitu mipui mardektu pawimawh tak an nih avangin an zalenna pawh hmang sual lo ber tura ngaih an ni a ti. Ram leh hnam siamna kawngah fak ngaite faka sawisel ngaite sawisel ngam thin tur leh dikna tan tlat chu an tih tur dik tak a ni ang a ti a. Sorkar hotu liante nen a khat tawka thukhawchang sawihona hun buatsaih thin chu a tangkai hle a rin thu sawiin hetiang hunah hian sorkar hmalakna leh thil tumte inhrilhhriata hrilhfiah ngaite inhrilhfiahna hun atan hman thin nise tiin a rawt a. Sorkar-in thil hrang hrang a zawrhchhuah thin (advertisement) chungchang sawiin hemi atana Budget a sum dah tih pun rawtna chu lo ngaihtuah a tum thu a tarlang a. Sorkar laipui hmalakna hrang hrangah te Information Education Communication (IEC) tih hmingpua sum thahnem tawk tak dah thin anih dan sawiin hetiang hi Mizoram department hrang hrangte hian ruahman thei se remchang hlea a rin thu a sawi a, Finance department hotute lo sawi zui pui a tum thu MJA member-te chu a hrilh a ni.

Vawiin Press Day hmanna ah hian thupui thlanchhuah India Media hmel danglam dan (The Changing Face of Indian Media) chu Mizoram bil mila sawihona hun hman a ni a. Pi P.B. Lianthangpui, IPRO kaihhruaina in thupui thlan hrang hrangah huamzau taka sawihona hun hman a ni a. Mizorama chanchinbu chhuak hmasa ber nia hriat Laisuih niin vawiin thlenga tualchhung chanchinbu damrei ber chu Tawrhbawm anih thu tarlan a ni. Tualchhung chanchinbuten khawtlang leh ram tana an hnathawh hrang hrangte haumzau taka sawilan a ni.

Thu hmahruai sawitu Director I&PR Pu Jim K. Chozah chuan Press Council of India duhdan anga he ni buatsaih anih dante hetiang hun hman hian chanchinbumi leh sorkar inkarah rah tha a chhuah beisei a nih dante a tarlang a. MJA President Pu K. Sapdanga chuan lawmthu sawina hun changin hun hnung a khar a ni.