State Level National Rural Health Mission(NRHM) hnathawh te thlir letna hun ni 4 chhung awh tur chu Tourist Lodge, Chaltlang ah Health Minister Pu Lalrinliana Sailo ho a neih ani a, Dr.K.Ropari, Director of Health Services in kaihruaiin District hrang hrang a Chief Medical Officer te he hun ah hian an tel tha hle.

NRHM in Mizoram pum huap a Health lama hnathawk tha te a thlan chhuah 1) State Best Performing Medical Officer, Dr.Isaac Lallawmsanga, MO, Buarpui PHC, Lunglei District, 2) State Best Performing Community Health Officer/Health Supervisor, Pu Rochungnunga, H/S, Aizawk, Aizawl West District, 3) State Best performing Health Worker(male) Pu T.Ngokhaw, HW Rawmibawk, Saiha District, 4) State best performing Health Worker(Female) Pi Lalhlunchhungi, HW(F), Saipum Sub-center, Kolasib District, 5) State best performing ASHA, Pi PC.Thangmawii, ASHA, Sesawng, Aizawl East District. 6) Most improved/Best performing district ah Aizawl West District te hnen ah Chawimawina hlanna a nei hmasa a, Dr.K.Ropari, Director of Health Services in District hrang hrang ah hnathawk tha te hnen ah chawimawina a hlan bawk. Heng hnathawk tha thlanchhuah chawimawina hlan te hi in elna tha leh mipui te tana kan rawngbawlna kawng ah min ti chaktu leh mite fuihphur zel tu nise a tih thu sawiin,Health Minister chuan kan hnathawh phung alo chak leh zualna atan kan insiamrem chho mek zel a, Chief Medical Officer zawng zawng te pawh an bial chhung a hmasawnna awm reng reng enpui tam deuh tur leh an hnathawh te chik leh zual tur a fuih in Health Workers te pawh an pawimawhna a hriatpui thu sawiin report dik tak leh rin tlak siam thin turin a chah a, heng kan report pek te hi, Mizoram chhung mai ah a tawp lova, WHO hial a thleng pha anih tih an hriatreng a pawimawh thu leh, kan kalphung leh kan hnathawh te midangte entawntlak leh chhawm zel tlak a thawk zel tur kannih thu a sawi bawk. Health Care lam sawi belh leh in mipuite, sawrkarin enrollment a hawn hun chhung rei tak a siam a, tu pawh in kan hma hun tur leh damloh hun tur kan sawi lawk theihloh avangin, sawrkarin, mirethei zawk te leh mipui nawlpui te tana scheme tha tak a duan hi hmang tangkai theuh thei se a duh tak zet thu leh hemi ah hian thawktu te pawh nasa leh zual zawk a tan la turin a chah a, Health Care lama kan san phawt chuan leh tun ang zel a thawh hona tha leh team work tha kan neih chhoh zel chuan khawvel ah pawh kan inrelbawldan hi entawn tlakin kan chhuah thuai ang, a ti bawk.

Dr.Lalthanga, State Programme Officer, Reproductive & Child Health in NRHM hnuai a programme hrang hrang hnathawh tlangpui report a pe a, Kum 2012 - 13 chhung hian Nu naupai Sub-center a in register zat mi 26432 an awm thu leh, heng zing a mi 14933 te chu nau an pai atanga thla 3 ral hma in Sub-center a in register an ni. Tin, mi 17579 zet te chu mithiam te duh dan in naupai hun chhung a vawi 3 in checkup leh damdawi eitur Iron Folic Acid mum 100 ei leh Vaccine la kim anni a, heng zawng zawng zing a 92% chu mithiam te hnen ah nau nei Safe deleivery) an ni. Kum 2012 - 2013 chhung khan nausen kum 1 hnuai lam thi mi 714 an awm a, Nu naupai leh a kaihnawih a vanga thi mi 15 report a awm bawk ani ati.

Chawhnu lam ah District hrang hrang atanga report ngaihthlakna leh sawihona te neih aniin hmalak leh zel dan tur te sawihona neih tur ani a, he meeting hian ni 4 chhung a awh dawn ani.

Health Minister hian Review meeting a hman zawh hnu hian ama Office ah Health Secretary, Director, Hospital & Medical Education, Health Services leh Health Official ho te nen Falkawn State Referral Hospital ah Doctor leh thawk tu dang dang lak dan tur chungchang sawihona an nei nghal a, a rang lama hnathawktu daihlohna leh mamawh zual te phuhruk a, ti chak leh zual dan tur sawihona an nei bawk.