Vawiin chawhma dar 10:00 khan Lunglei Circuit Conference Hall ah Lok Sabha MP Pu CL Ruala leh Rajya Sabha MP Pu Lalhmingliana te chuan District Officer liante kokhawmin Kum 2013 April thla thlenga district hmasawnna tur a Sorkar-in sum a sen tawhte leh thawktute hmalakna te an endik a. District Official te chuan Lunglei Bawrhsap Pu V. Sapchhunga kaihruaina hnuai ah an hmalak dan, an thlen chin leh harsatna thenkhat sutkian dan tur a an rawtna leh ruahmanna te MP te hnen ah hian an thlen a, Meeting ah hian DRDA hnuai a hmalakna MGNREGA, IAY, IWMP te bakah PWD chan PMGSY, P&E, endikna hnuai a RGGVY kalpui mek te bakah Social Welfare hnuai a National Social Assistance Programme (NSAP) leh PHE hmalakna te chipchiar tak a bihchian a ni. MP te Pu CL Ruala leh Pu Lalhmingliana te chuan meeting hmasa a kangmei laka ram venhim uar tur ti a rel chu a hlawhtling tha tawk lova. Nasa zawka mipui zirtirna pek a ngai hle niin an sawi a. Kumtin kangmei vangin ram nasa takin a kang chhe si a, thingphun hun te a lo ni chho ta bawk nen, nasa zawk leh kangchhe zat aia tam thingtiak phunthat a, ramngaw siamhna thawh a ngai a ni an ti. Thutkhawm hmasak a reltawh angin tui dahkhawlna siam hna thawh mek erawh chu a tha thawkhat a, tui harsatna hmun tamtak a sukiang mek niin a lan thu an sawi thung. IAY Scheme hmang a mirethei leh harsa zawkte Insak sak kalpui mek ah thil lawmawmlo a awm nual a. He Scheme hi thazawk a kalpui a nih theih nan BDO te rawtna ang a Permanent Waitlist, IAY dawngtu turte hming ziah tlarna chu enfiah thuai turin MP te kaihhruai District Vigilance and Monitoring Comittee chuan BDO te chu a ranglam a Gram Sabha buatsaih turin a hriattir nghal a ni.

Meeting Agenda paper a Report in a tarlan dan chuan Kum 2012-2013 Financial Year ah Lunglei District chhung Job Card nei mi 33357 zing ah 32678 te tan Rs 5032.715 lakh sengin ni 75 hnathawhna siamsak a ni a, Chhungkaw harsa zual 444 te tan chenna inthar sak hna Rs 215.34 lakh sengin thawh a ni tawh a. Chhungkaw 180 te in thuamthat nan Rs 2700 lakh a ni tawh bawk. Lunglei District chhung a kawng 11 Kilometre 139.915 laihna tur Rs. 5423.84 lakh ruahman a tangin kawng 8 Kilometre 89.255 laih zawh tawh leh kawng pa3 laih mek a tan Rs 3803.55 lakh hmanral a ni tawh a. Kawng 3 laih mek hi kumin December thla hma a zawh fel tum a nih thu tar lan a ni.