Ram puma khua leh tui ten tui in tur hnianghnar an neih theih nana Sorkar Laipui hmalakna National Rural Drinking Water & Sanitation Awareness Campaign 2014 chu vawiin chawhma dar 10:00 khan PHE Minister Pu Zodintluanga’n Synod Conference Centre, Aizawl ah a hawng.
Hawnna thu sawiin Minister chuan tui chu thilnung tinreng mamawh, a tel lova awm theih loh a nih avanga sorkar pawhin tui hnianghnar mipui ten an neih theih nana theihtawpa hma a lak chhoh mek thu a tarlang a. Hmasawnna, khawsak sang leh mihring pun zel vanga tui mamawhna a san zel laia indaihlohna a pun chhoh zel dante sawiin ruahtui te khawl khawma, tuihnar te uluk taka humhalh a pawimawh thu te a sawifiah a, Sorkar leh Central YMA te pawh tanghovin hemi lama nasa taka hma lakna chuan rah duhawm a chhuah mek dante a tarlang bawk. Ram ngaw chereu-in tuihnar a tihkang zel avanga Mizoram chhunga khaw thenkhat ten tui in tur tha an la nei lo chu pawi tiin, Sorkar-in tui in tur hnianghnar an neih theih nana hma a lakna bakah mitin ten tuihnar leh ramngaw te humhalh tlat tura hma kan lak tlan a tul thu a sawi lang bawk. Tuihnar leh ramngaw humhalh hi mitin mawh a nih hriaa mahni theihna zawn theuhvah tan la thar theuh turin Minister chuan kalkhawm te chu a sawm bawk a ni. Bawlhhlawh, zun leh ek thli felfai leh thianghlim zawka thehthang kawnga Sorkar Laipuiin Nirmal Bharat Abhiyan project a ruahmanna hnuaiah Mizoramah BPL chhungkua, school leh anganwadi ah te hma lak mek thu sawiin khaw fai lawmman pawh 89 laiin an dawn tawh thu a tarlang bawk. Hetianga tui leh inthiarna thianghlim neih a nih theih nana khaw tina Village Water & Sanitation Committee din a ni chu lawmawm tiin chak zawka hma la theuh turin a chah bawk. He Commitee hian tuilak leh enkawl zui, tuihnar humhalh, tui enfiah tur (sample) lak khawm te, ek in thianghlim leh tha nei tura hmalak leh enkawl zui, bawlhhlawh leh thli mumal taka senghawi chungchangah mawh a phurh thu a sawifiah bawk.
Parliamentary Secretary Pu Hmingdailova Khiangte pawhin thu sawiin hmanlai pi/pu te huna ramngaw leh tuihna an lo humhalh that dante hre renga mitinin hemi kawnga tan kan lak a pawimawh dan a sawifiah a, midang kuta dah mai lova mahni hma zawn theuhvah tan la turin kalkhawmte a sawm bawk.
Vawiina National Rural Drinking Water & Sanitation Awareness Campaign hawnna ah hi PHED Secretary Er.Lianchungnunga’n a kaihruai a, Tui leh Invawn thianghlim Beihpui thutiam te chhamrual a ni a, lemchan leh debate te neiin hemi puala SMS leh Essay inziahsiaknaa titha te hnenah lawmman sem a ni bawk.
