Pu R. Romawia, Art & Culture Minister chuan vawiin khan Mizo lemchan kum za lawmna pual a nihnih awh tur Mizo Drama Festival, Vanapa Hall-a neih chu a hawng. He Festival hi NEZCC, Dimapur leh Art & Culture Department tangkawp buatsaih a ni. Hawnna inkhawm hi Pu Ngurbiaka, Director, Art & Culture in a kaihruai.

Hawnna thu sawiin Minister chuan literature a thang ang bawkin lemchan hian khawvel ah hma  a sawn ve zel a, keini Mizo te pawh hian hmasawn turin lemchan mai bakah a costume-ah hmasawnna tur kan nei a ni, a ti. Drama hian min ti hlim a, ngaihtuah zuina min pe thei a ni tiin Minister chuan lemchan hi entertainment ang ringawt nilovin, hringnun kan zawh laia kha mipuite hnenah kan pholan thiam a ngai a ni a ti bawk.

Mizo lemchan hmasa ber chu kum 1912 Christmas lai in Pu Zosaphluia hovin nu leh pa leh thalai ten Thakthing tlang Zawlbuk ah lem an chang a, hetah hian mi 600 vel an kalkhawm a ni.

Vawiina lemchan te chu :

 1  The Caucacian Chalk Circle  IMFA Drama Party 
 2   Siamthar lehna  Champhai Vengsang Branch KTP Drama Party
3  Duhaisam  KTP Tuikual North Branch
 4  Hnam Inpumkhatna  Centre Stage Entertainment, Serkawn, Lunglei

 26 February chawhma dar 11 atangin lemchan tan leh a ni ang.  Lemchan tur te chu:-

 1  Zonun Hlui The Theatre Arts of Mizoram 
 2 Unau vek kan lo ni e  MCO Kolasib
 3  Pati Dholar Xabda  Okaitan, Palasbari, Assam
 4   The Bishop’s Candle Stick  Helen O Grady