Thingtlang mite tana eizawnna ngelnghet leh an khawsak chawikanna tura ram pum huap hmalakna pakhat National Rural Livelihood Mission (NRLM) chungchanga workshop chu vawiin khan Aijal Club Conference Hall-ah nileng a neih a ni a, RD Minister ni bawk Pu R. Lalzirliana’n workshop hi a hmanpui a ni.

Mizoram State Rural Livelihood Mission, Chief Executive Officer, Pu Nghaklianmawia kaihhruai workshop bultanna ah hian RD Minister chuan hetiang hmalakna tha leh chhenfakawm tak hi a hlawhtlin a, a chhawrtu tur thingtlang mipui ten an tangkaipui theih nan a thawktu zawng zawng te, Bank lam thuneitu te leh he Mission zar zo tur te inkarah thawhho na tha leh inrintawkna nghet tak a pawimawh hmasa ber a ni, a ti a. Self Help Group (SHG) te chu rintlak leh mahni kuta ding thei ngei tura chher turin, Block leh District huam chhunga hnathawk tur a lak te chu zirtirna dik tak, taima tak leh tih tak zet a pe turin a fuih bawk a ni.

Vawiin workshop-ah hian Secretary RD Pu R. Lalvena chuan thuhma sawiin, he Mission tobul leh a thil tum te, kaihhruaina hrang hrang leh hriat tur tul thil tangkai te a hrilhfiah a. Mithiam ruat bik ten zirtirna an pe a, DRDA Project Director hrang hrang ten an hmalakna leh an thlen chin te sawiin, thil tangkai tur thahnem tak zir ho a ni.