Vawiin chawhma dar 11 khan 65th National School Games Boxing U-17 Boys Mizoramin November 19-22,2019 chhunga kan thlen turah Organising Committee chu School Education Minister Office chamber-ah neih a ni a. Committee peng hrang hrang hmalaknate an thlirho.
    
Rampum huap National school Games Boxing ah hian infiammi zirlai 400 leh official 71 an vaiin 471 an lo kal dawn a. He National School Games Boxing hi R.Dengthuama Indoor stadium Mualpuiah thlen a ni dawn a, state hrang hrang atanga lo kalte chu R.Dengthuama Hall ah te, Rajiv Gandhi stadium leh Aizawl College Commerce building sak tharah te thlentir an ni dawn a. Tunkar tawp lamah hian infiammi thenkhat chu an lo thleng dawn a ni.
   
Organising Committee bakah hian Sub Committee 11 siam a ni a, heng committee te hian an hmalakna te an report a ni.
   
He National Games hi Nov 19,2019 Thawhlehni dar 2 ah R.Dengthuama Hall ah hawn a ni ang a, Nov 22,2019 Zirtawpni chawhnu dar 1 ah kharna hun hman a ni ang.
  
Pu Lalchhandama Ralte School Education Minister chuan mahni hmazawn theuhah theihtawp chhuah turin committee hrang hrangte a chah a. National Level anih avangin state hrang hrang infiammi ten tlangnel tak leh hlim taka an cham chhunga hun an hman theih  nan tan lak theuh a pawimawh  thu a sawi a. State dangin mikhual an thlen dan atanga teh pawha zahpuiawm lo tak ni turin a chah a, Committee peng hrang hrangte chu an hmalaknaah lawmawm a tih thu a sawi a, thawhhona tha neia indawr tawn fo turin a chah bawk.
  
National School Games Organising Committee ah hian Pu Lalchhandama Ralte chu chairman a ni a, Pu L.Thangmawia Vice Chairman, HRD te, School Education Department Officer te bakah Department hrang hrang officerte an tel a, member an kal tha hle a ni.