Kawlphetha renchem inzirtirna atana ruahman school naupangte inelna State Level Painting Competition on Energy Conservation chu vawiin khan Chaltlang YMA Hall-ah neih a ni a. Irrigation & Water Resources Minister Pu C.Lalrinsanga chu khuallian a ni.

Pu C.Lalrinsanga chuan kawlphetha remchem hi ram economy hmasawnna peng pakhat a ni, a ti. Zirlai naupangte zinga lemziak intihsiak buatsaih chu intihsiak satliah ni lo, chhan fel tak leh hlu tak neia buatsaih a ni, a ti a. An lemziah phenah ram economy a awm tiin Minister chuan naupangte a hrilh a. Sawrkarin ei leh bar intodelhna atana hma a lak chhohnaah inremchem inzirtir zel a tum a, he competition rem hre taka buatsaih a ni hi a hlu hle a ni, a ti. Nu leh pa leh zirtirtu kalkhawmte pawh fuihin naupangte chauh nilo Mizoram mipuiin he competition buatsaih chhan, thil tum ropui tak a neih hi hria a, zawm tu nih theuh a pawimawh Pu C.Lalrinsanga chuan a ti bawk.

He Painting Competition hi National Campaign on Energy Conservation - 2019 hmangin Bureau of Energy Efficiency, Ministry of Power; State Designated Agency for Energy Conservation, NEEPCO leh Mizoram Sawrkar chuan tang tlangin an buatsaih a. Mizoram chhunga School hrang hrang 79-ah zirlai 2560 ten intihsiak an bei a. A titha mi 96 ten State Level inelna hi an hmachhawn leh a ni. Zirlaite hi Group A leh Group B ah then an ni a. Group A ah hian Class 4 atanga Class 6 zirlaite an tel a, Group B ah Class 7 atanga Class 9 zirlaite an tel thung.

Lawmman pakhatna hian cheng 50,000, pahnihna cheng 30,000, pathumna cheng 20,000 bakah thuziak hlan an ni a. Consolation prize Group A leh B ah sawm ve ve thlan chhuah niin cheng 7500 theuh pek an ni. He inelnaa tel zawng zawng ten participation prize cheng 2000 leh sana (wrist watch) an dawng theuh bawk. Group A-a lawmman pakhatna atanga pathumna dawngtute hi New Delhi a rampum huap intihsiak buatsaihah an tel leh dawn a ni.

Group A-a lawmman pakhatna dawngtu chu Lalremruati, Tuithaveng Upper Primary School, Kolasib; pahnihna dawngtu chu Lalruatpuia, Kualmawi PES, Bilkhawthlir; pathumna Lalfaksanga Junior, Tuikhurhlu Upper Primary School zirlai a ni a. Group B ah lawmman pakhatna dawngtu chu Ramthlanmawii, Tiny Tots Hr.Sec.School, Aizawl; pahnihna H.Lalnunfela, Radiant Hearts School, Thingsulthliah; pathumna Hamida Kawsar, St Henry’s School, Vairengte te an ni.