Mizoram Journalist Association General Hqrs President Pu Zonunsanga Khiangte leh a thawhpuiten nimin leh vawiin khan Lunglei District-a Department hrang hrang hmalaknate a hmunah kalin an enfiah.

Nimin khan MJA General Hqrs hruaitute leh MJA Lunglei te chuan Mizorama Hydel project hmasa ber dawttu Khawiva Mini Hydel Project an tlawh a. Khawiva Sub Station SDO Er Ng. Lalruatsanga leh a thawhpuiten lo dawngsawngin an hmalakna leh hmachhawpte sawihovin an enfiah a ni. Kum 1986 khan Hydro Electric Division in thawk tanin 350 kW unit awmin tun dinhmunah kum tin unit nuai 6 atanga nuai 7 inkar siam chhuak ang a ni. He project hi tuai thar leh a nih hnuah Department lamah mihring indaihlohna avangin M/s Amazon Engineering Vaivakawn hnenah kum 2010 khan hlan a ni a, an ni hnen atang hian sorkar in Rs 1.05 in unit khat a lei ve leh thin. He project hian kum 1988 atangin vawiin thlengin 26.33 MU (million unit) a siam chhuak tawh a ni. Helai hmunah vek hian Khawiva 132 sub station kum 1988 khan thawh tan a ni a, power hi Zuangtui atanga Bukpui kaltlang a dawn niin Khawiva atang hian chhimlam District pathum: Lunglei,Lawngtlai leh Siaha te pek leh an ni.

Nimin vek khan MJA hruaitute hian Agriculture Department hmalakna tlawhin Pu Tlangtimawia Zote District Agriculture Officer (DAO) Lunglei chuan Lunglei High Powered Committee (HPC) kaltlangin Agriculture, Industry leh AH & Vety Department te tangkawp chuan Green Revolution an kalpui mek thu alo hrilh a. Artui a intodelh tum a nih avangin Ar chawmna tur chaw tha atan kuthnathawktute Vaimim an chin tir a, an tharchhuah te HPC in leiin, chu chu Ar chaw a tan siam a ni dawn, a ti a. Ar chaw siamna khawl an bunte chu Journalist te kawhhmuhin, an hmuh lai hian Vaimim atanga Ar chaw siam a nih dan entir a ni.

Pu Laltanzuala General Manager DIC pawh telin Industry department-in Lungleiah NEC hmangin project lian tak tak hnuhluh a tum a, ruahman anga a kal thei a nih chuan Lungleia Auto Rickshaw te chu petrol hmang lovin electric hmanga tlan tir theih a ni ang, a ti.

Tin, vawiin khan MJA hruaitute hian Civil Hospital Lunglei an tlawh a. Dr SR. Ngurchamliana Medical Superintendent-in MJA hruaitute hi a lo dawngsawng a, Civil Hospital dinhmun a lo hrilh.

Civil Hospital Lunglei hi kum 1900 khan khum 20 nena bul tan a ni a, tunah hian khum 160 a awm mek a, Doctor Specialist 17, Medical Officer (MBBS) 5, Medical officer (AYUSH) 3, Dental Surgeons 2 an awm a, Nursing Superintendent 2, Ward Superintendent 3, Staff nurse (regular) 34, Contract 27 an awm a, Technician, Group D, office Staff leh Driver 70 chuang an awm bawk. He hospitalah hian August 2018 khan  CT Scan bunin tunah hian nitin damlo 4 bawr vel en ziah ang an ni a, Oxygen generating Plant install mek a ni a, 13 Nov 2019-a an enchhinah chuan a nih dan tur dik takin he plant hian hna a thawk. Oxygen pipeline 70 leh suction pipeline 40 vuah a ni tawh.

Hospitalah hian department hrang hrang leh speciality hrang hrang a awm vek laiin, Pediatric tih lohah chuan Doctor pakhat theuh an awm a, damlo tam zualna department Medicine, Gynecology, Surgery leh Anesthesiology-ah te Doctor indaihlohna a nasat thu leh Doctor dah belh an mamawh thu Medical Superintendent hian a tarlang a ni.