Vawiin khan Lunglei SP Conference Hall-ah District Crime Review meeting chu Dar 11:30 Am atangin Dar 3:30Pm thlenga neih a ni.

Crime Review meeting hi session thumah then niin Session hmasa ber hi Pu C.Lalthanmawia, MPS, SP in a kaihruai a, Lunglei District chhunga dan bawhchhiatna thlen dan te thlirhona leh sawizauna hun hman a ni a. Session hnihna ah hian Pu Lalchhuanthanga, MPS, Addl. SP, Lunglei hovin Case chhui mek, la chhui zawh loh ho chungchang sawiho a ni a. Session thumnaah hian Public Prosecutor te nen hnuchhuina leh misual hremna kawnga pawimawh an sawi ho bawk.

January ni 1, 2019 atanga 11th November,2019 chhung hian Lunglei District huam chhungah case 185 ziah luh tawh a ni a. Chung zinga 152 chu chargesheet  niin, case pariat (8) chauh chhui chhuah theih mai loh avanga case khar rih a awm a, case 25 chu la chhui mek la zawh chiah loh a ni. Case 23 chu case pawimawh zual a ni a, chung zingah chuan pawngsual thubuai 4 a awm a Naupang khuaikhem thubuai 3, Tualthah tumna 3, Ruihhlo kaihhnawih 7, Mi suam Case 1, Accident na tak 2 leh Mi nunna laksak (Tualthat, Murder ni silo) Case 3 a awm bawk. ILP kaihhnawihah case 11 ziah luh niin, mi 84 man an ni. Hemi hun chhung hian Zu, Damdawi leh Ruihhlo dang kaihhnawih hi Cheng 2,582,750/- hu man a ni tawh bawk. 

January ni 1, 2019 atanga 31st October, 2019 chhungin Motor ke pali nei 914, Ke pathum nei 307 leh Ke pahnih nei 798 mana chawi tir an ni tawh a, Cheng 6,39,000/- a tling khawm tawh a ni. Hemi hun chhung hian mi 16 Driving license chu Cancel turin DTO ah thawn tawh a ni.