Vawiin hian Government Serchhip College Smart Class-Room ah National Science Day, 2017 chu Serchhip College leh Mizoram Science, Technology and Innovation Council tang kawpte buatsaihin hman ani a, mithiamte thusawi ngaihtlak hona hun hman a ni. 

National Science Day hi Pu Lalhmangaiha Sailo, Principal Government Collge chuan a hawnga, a hawnna thusawi tawiah Science thiamna avanga mihringten remchanna kan hmuh chhuah tam tawh zia sawiin, Science leh hmasawnna chu thil thuhmun sawina ang mai a nih thu a sawi a. “Kan pi leh puten mumanga an man phak hauh loh tur thil tam tak keini an tu leh fate hian Science zarah kan kawl teuh tawh a ni” a ti. National Science Day, Serchhip College a hman a nih theihna tura thawktute zawng zawng chungah lawmthu sawiin, a thawhpui Science zirtirtu zawng zawngte chungah lawmthu a sawi bawk  ani. 

National Science Day hi kum 1999 atang khan Thupui neia hman thin a ni a, kumina Day thupui atan hian “Rualbanlote tan Science & Technology” tih chu hman a ni. He thupui behchhan hian Pu Lalrintluanga Sailo, Asst. Professor, Department of Physics leh Dr. C. Vanlalnghaka, Asst. Professor, Department of Zoology ten thusawina hun an hmang a. Day hmang tura kalkhawm zirlai naupangte nen sawihona hun an hmang chhunzawm bawk  ani. 

Vawiina National Science Day, Serchhip Government College a hman hi Pu C. Lalramliana, Co-ordinator, Celebration of National Science Day 2017 chuan a kaihruaia, Serchhip Town chhunga Model High School atana thlan Government Chhiahtlang High School, Government Serchhip High School leh Government PCR High School a zirlai naupangte leh Government Serchhip Collge a Science zirlai naupangte leh sawm bik mi thenkhat te he hunah hian an tel a ni. 

National Science Day hi Indian Physicist lar  Chandrashekhara Venkata Raman (CV Raman tia hriat lar) in kum 1928 February ni 28 a eng zung nihphung ril tak “Raman Effect” tia hriat zui tak a haichhuah (discover) champha hriatreng nana kum 1987 atanga hman tan a ni a. Raman effect avang hian kum 1929 ah Knighthood pek a ni a, kum  1930 ah Dr CV Raman-a hi Nobel Prize in Physics pek a ni leh a, kum 1954 ah India Civil mite chawimawina sang ber Bharat Ratna (jewel of India) pek a ni leh bawk a ni.