Vawiin dar 11 khan Vanapa Hall-ah “Traffic Jam Free Aizawl” programme neih a ni a. He hun hi Pu R.Lalzirliana Home Minister, Coordination Committee on Traffic Management(CCTM) Chairman ni bawk leh Finance Minister Pu Lalsawta, Transport Minister Pu John Rotluangliana leh Parliamentary Secretary Lt.Col(rtd) Z.S Zuala ten an hmanpui.
Pu R.Lalzirliana chuan Aizawl khawpui kawng chu a zim bik lutuk tawh lo a ti a, kawngpui dung motor dahnana hman ani thin chu traffic ti jam nasa tu anih thu sawiin Traffic Jam Free Aizawl kan neih theih nan mipuite kan tanrual a pawimawh thu a sawi a. Local Council ten mahni veng ah theuh mawhphurhna sang tak kan nei ani tiin sawrkar hmalakna te thahnemngai taka tawiawm turin a sawm a ni. Home Minister chuan insa tharten motor dah theih nghal tura an siam ve ta zel chu lawmawm a tih thu sawiin kan inzirtirna rah hmuh tur awm thin chuan mi ati phur a ti a. Khawpui laili laia inhmun neilo mi harsa zawkte tan pawh an ram neihna hmun ah te midangte hmanhawh tur garage te an siam hi eizawnna a tling a ni ati . Bawngkawn kawngdunga AMC in foothpath leh a hungna tha tak an siam chu lawmawm a tih thu sawiin ke-a kalte pawh foothpath hmang uar turin Home Minister chuan a chah bawk a ni.
He programme ah hian Finance Minister Pu Lalsawta chuan Aizawl khawpui chu Traffic Jam Free alo nih theih nana sawrkar hmalakna hrang hrang te tarlangin Aizawl Zoning te an buatsaih mek thu leh Uber leh Ola (taxi service) te remruatna ang hmanga awlsam, tlawm leh rang taka taxi service kalpui dan ngaihtuah mek anih thu a sawi a. Heng ruahmanna te kalpui anih theih hunah chuan kawngpui alo thawl zawk tawh dawn ani, ati . Finance Minister chuan hmasawnna tura thiltih danglam dawn reng rengin dodaltu an tam thin thu sawiin traffic Jam Free Aizawl chu mi tam takin tih theihlohah ngai mahse mipui, Local Council, AMC, leh sawrkar lama a mawhphurtu department hrang hrangte tangruala kan thawhho phawt chuan kan ti thei dawn ani a ti a. Kumin December ni 1 ah chuan Aizawla lirthei (eng chi pawh) neitu zawng zawngin lirthei dahna neih vek tawh tur anih thu Pu Lalsawta chuan sawiin lirthei neitute hemi hma ngeia a dahna siam turin a chah bawk a ni.
Transport Minister Pu John Rotluangliana pawhin he hunah hian thusawiin Traffic Jam Free Aizawl kan neih theih nan sawrkar hmalakna hrang hrang mai bakah a kawng hmangtu mipui leh lirthei khalhtu te kan pawimawh thu a sawi a. Lirthei khalhtute chu hawihhawm tak leh midangte tana harsatna siamlo thei ang bera khalh tura chahin kan thiltumte hlawhtlinna atan kan tanrual angai ani, a ti.
Traffic Jam Free Aizawl Programme hi Pu Lalbiakzama, Additional Secretary Home Department chuan a kaihruaia, zawhna leh chhanna hun te hawngin kalkhawmten an vei zawng leh rawtna te sawina hun an nei a ni.
