Vawiin khan Mizoram Science, Technology & Innovation Council (MISTIC) bul tumin I&PR Auditorium-ah National Science Day 2017 lawmna neih a ni a. Pu H.Liansailova, Vice Chairman, Mizoram State Planning Board in a hmanpui.
Pu H.Liansailova chuan National Science Day 2017 lawmna hun ropui tak buatsaih a ni chu lawmawm tiin tunlai khawvel-ah science leh technology tel lo chuan hmasawn chak a harsa tawh a, Mizoram mipui tam zawk innghahna ran vulh leh lo neih pawh tunlai thiamna hmang tangkaiin hei aia thar rang, thar tam leh hlawk zawk, hralh suma chan tir theih turin kan buatsaih zel a tul a ni, a ti. Science leh technology hi mihringte khawsak phungah awlsamna tam tak thlentu a ni a, pianphunga rualbanlote pawhin nun nuam zawk an neih theih nan tunlai thiamna hmangin anmahni tanpuitu tur khawl tha zawk siam chhuah zel a ni tih sawiin Mizoram State Planning Board Vice Chairman chuan Mizo zinga science & technology lama sulsutu mithiam hmasate chungah bat kan ngah hle a ni, a ti bawk.
Dr. C. Vanlalramsanga, Secretary, Planning (Science & Technology) pawhin kal khawmte lawmna thu sawiin, kan nitin nunah Science leh Technology a pawimawh chho zel a, khawvel changkang zelah Mizo mipuite pawhin a hman tangkai dan kan thiam a ngai a ni, tiin National Science Day ngai pawimawha Mizoram hmun hrang hrang a hman a nih chu lawmawm a tih thu a sawi.
He huna thusawitu dang Dr. R.K. Lallianthanga, Chief Scientific Officer, Directorate of Science and Technology chuan National Science Day chungchang a sawi fiah a. February ni 28, 1928-a India scientist Dr CV Raman-a’n ‘Raman Effect’ a hmuh chhuah hriat reng nan kum 1987 atang khan February 28 hi National Science Day-ah hman thin a ni, a ti . Chief Scientific Officer chuan National Science Day pualin district zawng zawng ah Mizoram Science, Technology & Innovation Council (MISTIC) kaihhruaina hnuaiah hun hman a nih thu sawiin, he ni hi mizo mipui te, a bik takin zirlaite huam kim thei tur a hmalak mek a nih thu a sawi bawk.
National Science Day 2017 thupui (theme)-ah hian “Science and Technology for Specially Abled Persons” tih hman a ni a. Hemi pual hian Exhibition buatsaih nghal niin, National Institute for the Locomotor Disabilities (RC-NILD) ten pianphunga rualbanlote tana siam khawl ‘Aids and Appliances for Specially Abled Persons’ an pho chhuak a. Powerpoint hmangin thupui thlanbik pahnih - “Science & Technology – A Solution for Specially Abled Persons” leh “Special Ability – A Mizoram Context” tih ngaihthlak a ni bawk.
National Science Day 2017 lawmnaah hian Science and Technology Department mi te, tlawmngai pawl aiawh te, Women’s Polytechnic leh Durtlang Special Blind School zirlaite leh zirtirtute bakah sawm bik mi pawimawh dang te an tel a ni.
