Vawiin chawhma khan Assembly Annexe Conference Hall-ah Mizoram Science, Technology & Innovation Council (MISTIC) buatsaihin National Science Day 2018 lawmna neih a ni a. Mizoram State Planning Board Vice Chairman, Pu H. Liansailova chu Khuallian niin kumin National Science Day thupui chu ‘Science & Technology for a sustainable future’ tih a ni.
Pu H. Liansailova chuan National Science Day hman a ni chu lawmawm a tih thu a sawi a. Science & Technology pawimawhna hi zirlaite leh zir chhuak tawh ten hre thar lehin mi nawlpui pawhin kan hriat thar leh a ngai a ni, a ti a. Science & Technology lama hma kan sawn a, kan thlen san ang zelin mihring nun pawh a changkang chho zel a ni tiin Science & Technology hman thiam chu ram changkang tehna pakhat a ni, a ti a. Mihring thiamna leh finna a taka chantir tur chuan Science & Technology hman tangkai a ngaih thu a sawi a. Scientist leh mi thiam tak tak thil siamchhuah leh hmuhchhuah chuan mihringte khawsak phungah awlsamna a thlen bakah harsatna ni thei tur pawh a chhawk zangkhai phah a ni, a ti a. Thalaite chuan kan ram hmasawnna kawngah chahbi pawimawh tak an kawl a ni tiin School leh College-a zirlaiten ram tana tangkai thei tur an ngaihtuah chhuahna turin rilru nei takin an thiamnate an hman a ngai a ni, a ti a. National Science Day hlawhtlinna tur chuan Scientist community ten tih tak takna nena hmalakna an neih a ngai a, chu chuan ram tan pawh hlawkna a thlen theih tur thu a sawi a ni.
February Ni 28, 1928-a India scientist Dr CV Raman-a’n ‘Raman Effect’ a hmuh chhuah hriat reng nan kum 1987 atang khan February 28 hi National Science Day-ah hman thin a ni a. Mizoramah chuan kum 2006 atang khan National Science Day hi hman tan a ni a. He Ni pual hian exhibition, talk show, seminar, lectures, van sang lampang zirchhianna, debate, quiz competition, exposure tour-te neih a lo ni tawh thin a ni.
Dr. R.K. Lallianthanga, Chief Scientific Officer leh MISTIC Member Secretary ni bawk chuan kalkhawmte lawmna thu a sawi a. Senior Scientific Officer Pu Samuel Lalmalsawma chuan National Science Day hman a lo nih tawh thin dan report a pe a. Pu Lalrammawia, Mizoram Science Centre atangin Scientific Demonstration hmuhnawm tak en ho a ni a. Principal Scientist Dr. Lalnunsiama Colney chuan ‘Science & Technology for a sustainable future’ tih thupui hmangin presentation a nei a. Principal Scientific Officer Pu H. Lalsawmliana chuan lawmthu sawina in hun a khar a ni. He hunah hian Science & Technology Department mite, DIET, ITI, Women Polytechnic, Durtlang zirlaite leh zirtirtute leh sawm bik an tel a. National Science Day hi Pachhunga University College, Govt. Zirtiri College, Govt. Kolasib College, Lunglei Govt. College, Govt. Serchhip College, Govt. Champhai College bakah Lawngtlai leh Mamit Govt. High School-ah hman a ni bawk a ni.
