4628/2025-2026

Dated Aizawl, 27th February 2026: Vawiin khan Mizoram Science, Technology & Innovation Council (MISTIC) bultumin India ram puma hman thin ‘National Science Day’ lawmna hun, Dawrpui Multipurpose Hall-ah hman a ni. He hunah hian Planning & Programme Implementation Department Secretary Pu Lalmalsawma Pachuau chu khuallian niin, Directorate of Science & Technology Chief Scientific Officer Er. H. Lalsawmliana’n inkhawm hi a kaihruai a. Directorate of Science & Technology (DST); MISTIC; Mizoram Remote Sensing Application Centre (MIRSAC) leh Mizoram Science Centre (MSC) te bakah Science kaihhnawih zirna in leh pawl hrang hrang hruaitute bakah zirlai thahnem tak an tel a ni.

Khuallian chuan Science & Technology pawimawhzia sawiin Science & Technology-a thawktute chu ram hmasawnna innghahna lungpui pawimawh tak an nih thu a sawi a. India ramin ram hmasawn leh intodelh ‘Viksht Bharat’ nih tuma tan a lak meknaah pawh, a kila lung tangkai berte chu Science mite an nih thu sawiin, Mizoramah ngei pawh ram hmasawnna atana Science & Technology-te hmalakna hrang hrangte tarlangin, nakin lawka ram hruaitu la nimai tur zirlaite thinlunga Science pawimawhna tuhtu an nih thu te, sik leh sa danglam dan Data an lakkhawm te, ram leilung dinhmun leh riruang thlalak GIS Map an buatsaih thinte leh zoram mil technology an zir thinnate chu Mizoramin ei leh bara intodelhna kawnga hma a lakna hrang hrang, lo neih lam leh a kaihhnawih Agriculture & Allied sector-te tan pawh thil pawimawh tak a nih thu a sawi a. He ni lawmnaa kalkhawm Science & Technology-a thawktute leh zirlaite chu theihtawp chhuaha, ram tan an thiamna leh theihnate ti pung deuh deuh tura chahin duhsakna a hlan nghal a ni.

Khuallian’in tun hnaia Science & Technology (DST, MISTIC, MIRSAC, MSC) hmalakna langsar zual a sawite:

• Mizorama Bio resources-te tangkai lehzuala Mizote’n kan hman theihna turin Mizoram Biotechnology Centre sak mek a ni.

• Space lam zirna leh hman tangkaina atan State Geo-Spatial Data Centre, vaibelchhe 16.8 man hu tur din turin hma lak a ni a, thui tak kalpui tawh a ni.

• Pa (mushroom) Centre tha tak din niin mizo thalaiten eizawnna tlaka Pa chi hrang hrang an khawi thiam theihna turin training pek thin an ni.

• Sialhawkah lakhuihthei chingtute tan hlu zawk leh man man zawk ni tura lakhuihthei an sawngbawl theihna tur Pineapple Processing Plant din niin hawn mai theih tura peih a ni tawh. 

• Lunglengah kurtai thar chhuahna lama hmasawnna tur nasa taka kalpui mek a ni.

• Selinga Food Processing Centre thawm that niin khawl thar pahnih bun a ni a.

• Zamuangah kuhva chingtute tan kuhva tih rona khawl din mek a ni.

• Tualchher kut themthiamna neite tan, an thiamna leh theihna tih punna turin Innovation Facility Centre (IFC), MINECO-ah din fel a ni tawh a. IFC hi local grassroot innovator leh entrepreneur mai bakah sorkar department hrang hrang ten an hmang tangkai hle a. Mizoram tana chhenfakawm tak tak khawlte an siam chhuak thin a ni.

• State Climate Change Cell din niin Mizoram sik leh sa inthlak danglamin kawng hrang hranga nghawng a neih theih dante zirbingna an kalpui bawk a.

• Thiamna leh theihna humhimna lam - Intellectual Property Rights hrang hrang - Copyright, Trademark, Geographical Indication, Patent leh a dangte an buaipui bawk.

• Zirlaite thinlunga science leh mathematics hlauhna tih bo a nih theih nan kawng hrang hranga hmalak thin a ni a. Science lam ngaihhlutna an neih theih nan Aizawl bakah Lungleiah pawh Science Centre din a ni tawh bawk.

• Science chawi larna leh hman tangkaina turin nasa takin hma lak a ni a. Hemi atan hian  kum tluanin programme hrang hrangte duan thin niin Mathematics competition leh Science competition, exhibition-te buatsaih thin niin hetiang programme atanga Science zirna lama tuina leh phurna nei, hlawkpuitute hi zirlai sing chuang an awm tawh a ni.

• Mizorama a hmasaber ni turin khawzawl-ah ni zung chakna hmanga thlai vawnthatna ‘Soloar Cold Storage’ an lo bun tawh bawk a ni.

• Bana Kaih Policy hnuaiah Chief Minister’s Inventor Challenge buatsaih niin Mizoram mil khawl (technology) siam chhuah dan kawng zawna, hmalak mek reng a ni bawk.

Vawiina National Science Day hawnna inkhawmah hian Mizoram Science Centre-a Curator Dr. Lalrinkimi chuan hmeichhiate’n Science lama hma an sawn dan leh Mizo hmeichhe hlawhtlingte tarlanna hun a  hmang a; NIT Dean (Academics) Sukanta Roy bakah Dr. Lalchhandami Tochhawng, Scientific Officer leh Pu Lalchhuanmawia Scientific Officer ten thu an sawi bawk. Pu K. Lalrammuana, Principal Scientific Officer, DST chuan lawmthu sawiin chawhma hun hi a khar a.

Chawhnu hunah Scientist, Professor leh Entrepreneur-te nen thupui hrang hrang hmangin thu sawina leh zir hona hun hman ho leh a ni a. Mizoram Remote Sensing Application Centre, Mizoram Science Centre, Mushroom Centre, Patent Information Centre, Innovation Facility Centre, State Climate Change Cell, India Met Department leh National Institute of Technology Mizoram ten exhibit item hrang hrang an entir bawk a. Science lama mi hlunte, Science NGO hruaitute, Sorkar lama Planning leh Science & Technology-a thawktute bakah zirna in hrang hrang National Institute of Technology Mizoram, RIPANS, ITI leh Boston HSS atang tein zirlai te an tel a ni.