UGC bultumin Government T. Romana College leh Mizoram Political Science Association te chuan nihnih awh tur National Seminar on Politics of Regionalism in North East India chu vawiin khan I&PR Auditorium-ah an buatsaih a. Mizoram H & TE Minister Pu Lalsawtan a hawng a ni.

Hmarchhak bial chhunga bial bil politics chungchang zirhona seminar hawngtu Pu Lalsawta chuan rampum huap thilah hmarchhak bial hian chanvo pawimawh tak a nei a ni a ti. Hmarchhak bial state te hian ram leilung pianhmang avangin harsatna angkhat an nei thin a, tun kum zabi 21 na ah pawh hian inkalpawhna chungchanga kan harsatnate chu a la ziaawm thei meuh lo a ni a ti. Pianphung danglam avang ngawt pawhin hmarchhak state mi chengte hian thlauhthlak leh enhran kan hlawh chang a awm thin a, chuti chungin hmarchhak mite hian India khua leh tui nawlpui nih kan zak lova, kan chhuang em em zawk thin a ni a ti. Hun engemaw chen khawthlang ramte tih dan phung kan lak hnuah tun dinhmunah erawh chuan khawchhak ram lamte nen inlaichinna tha neiin hemi a tan hian hmarchhak bial chu khawchhak ram pawhna kawngkharpui ber dinhmunah kan din tawh avang hian dinhmun pawimawh tak kan chang mek a ni tiin Pu Lalsawta chuan bial bil chungchang (regionalism) hian hnam pum thil nationalism a hril a, he seminar pawh hian chulam hawi zawngah chuan zirchhuah tur tangkai tak a thlen ngei a beisei thu a sawi a ni.

Vawiin seminar hawnna inkhawm hi Lalsangzela Pachuau, Coordinator in a kaihruai a. Govt. T. Romana College Principal Dr. F. Lalhmingsangan inlawmna thu a sawi a. Seminar thu kamkeuna Prof. Srinibas Pathi, MZU in a chang a, seminar chhung hian thupui thlan bik hrang hrangah state chhung leh pawn lam atanga mi thiam lokal ten thuziakte chhiarin sawihona hun hman a ni ang.