North Eastern Council (NEC) 60th Plenary chu ni 16 - 17 June 2011 chhung hian New Delhi-ah neih a ni a, he meeting ah hian India ram hmarchhak state pariat (8) Governor leh Chief Minister-te bakah official pawimawh tam tak an tel dawn a ni.
He meeting neih tur chungchangah hian Ministry of Development of North East Region (DoNER) chuan Mizoram sawrkar hnenah lehkha thawnin Mizoram sawrkarin zirna lam tih changtlun leh tihhmasawn a nih theih nana a zir chiang tur Commission a din chu tha an tih thu an tarlang a. He Commission Report-ah hian hmathlir pawimawh leh tangkai tak tak a chuan avangin hmarchhak state dangte pawhin hre ve se an duh thu sawiin he meeting-ah hian Mizoram sawrkar chu education bika a hmalaknate sawina (presentation) hun a siam sak hial a ni.
Mizoramin hetiang dinhmun a chang thei hi a chhinchhiah tlak hle a, hmarchhak state zingah Mizoram chiah hi hetiang hun siam sak a ni hi a ropui takzet a ni. Mizorama zirna in hma a sawn theihna turin Mizoram sawrkar chuan thahnemngai takin hma a la zel dawn a ni. He hun hmang tur hian Lt. Gen. (Rtd.) M.M. Lakhera, H.E. Governor of Mizoram a kal dawn a, Pi Esther Lal Ruatkimi, Education Secretary chuan presentation hun hi a hmang ang.
