Indian Institute of Public Administration, Regional Branch leh Mizoram University, Department of Public Administration tangkawp buatsaih ‘Thingtlang Hmasawnna leh Panchayati Raj’ chungchang zirhona National Seminar leh Rampum huap Seminar, New Delhi-a thlaleha neih tur inbuatsaihna chu vawiin khan I & PR Auditorium-ah neih a ni a, Education Minister Pu Lalsawtan a hmanpui a ni.
He National Seminar hi Mizoram Regional Branch IIPA President Prof. C. Lalkiman a kaihruai a. Seminar hmanpuitu Education Minister Pu Lalsawta chuan kum 1975 a Mizoram Civil Service-a a awm lai atang tawhin IIPA member a lo nih ve tawh thu a tarlang hmasa a. Tun dinhmunah India ramin thingtlang tih hmasawnna tura hmaa lakna hrang hrangah hian a pawimawh hmasa ber chu thuneihna insemzai hi a ni a ti. Entirna siamin Pu Lalsawta chuan chhungkua ah pawh thuneitu lu ber, pa berin inchhung inrelbawlna thu sepsel te te thlenga a inrawlh chuan chhungkaw in lungrual leh hmasawn a nih theih ngai lova. Pa mawhphurhna chin a awm angin chhungkaw nu ber leh an fate pawhin tih tur leh mawhphurhna chin hrang an neih vek a tul ang bawk hian ram inawpna leh inrelbawl kawngah pawh thuneihna sem zai leh hman thiam chu hmasawnna bul a ni fo thin a ti. Thingtlang tih hmasawn kawngah hian Mizoram sorkar hmalakna te chu rampum huap ang pawha chhuan tham tling nia a ngaih thu Education Minister hian a sawilang bawk a ni.
He hunah hian khual zahawm tuna MZU Acting Vice-Chancellor nihna chelh mek Prof. A.K. Agarwal pawhin thu a sawi a. In lawmna thu Dr. Lalrintluanga, Head, Deptt. of PA, MZU in a sawi a. Presidential Remarks Prof. C. Lalkiman a neih bakah Prof. Srinibas Pathi, Hony. Secretary, IIPA-MRB, Aizawl chuan thupui sawina hun a chang a ni.
Chawhnu lamah Technical Session neiin mithiam thuziak chhiar chhuaha sawihona hun hman zui a ni.
