Vawiin khan nithum awh tur National Seminar on Geodynamics, Sedimentation and Biotic Response in the context of India- Asia Collision’ chu Beraw Tlang-a Conference Hall-ah Chief Secretary Pu Vanhela Pachuau IAS chuan a hawng. He seminar ah hian India State 21 atangin palai 125 an tel a. Heng palai te hi Research Institutions, IIT leh University atangin  an lo kal a ni.

 

 

Hawnna thuchah a sawina ah Pu Vanhela chuan tunlai khawvel dinhmun thlira hetiang thupui tha tak thlanchhuah a ni chu lawmawm a ti a. Khawvel hi a zim sawt hle a, ram hrang hrangte pawh tunlai thiamna hmanga kan intlawhpawh zung zung theih tawh hunah hian sum pai dinhmun leh Hydrocarbon khawlkhawm pawimawhna te chuan inzawmna thuk tak a nei a. Sik leh sa inthlak danglam ta lutuk leh chumi ina harsatna a thlente chuan ram dam khawchhuahna tur pawh thui takin a nghawng tawh a ti a. Mizoram chu lirnghing thlen theihna hmun nia an sawi tarlangin hemi kawngah hian sorkar leh mipuite chu theih ang tawkin an inralrin dan a tarlang. He seminar-a  mithiam hrang hrang lokal ten an thil zir leh hmuhte chu mipui nawlpui hriatthiam theih zawnga phochhuak turin a sawm a ni.

Pu Benjamina, Registrar MZU chuan seminar palaite lawmna thu a sawinaah he hun hi Mizoramin rampum huap scientist pawimawh a thlen khawm tam ber tum a ni tiin an ngaihtuahna leh an thiamnate thahnemngai taka thawha India ram mai bakah Asia khawmualpui tan pawha ngaihdan tha tak siamchhuak turin a sawm a ni.

Seminar chhim tur hian ramchhung scientist mithiam leh sorkar laipui mi pawimawh thahnem tak an lo kal a. Chung zingah chuan Dr. H.K. Gupta, President, Geological Society of India, Bangalore, D.P. Singh, Jt. Secretary, Ministry of Earth Sciences, Govt. of India, Dr. N.C. Mehrotra, Director, Birbal Sahni Institute of Palaeobotany, Lucknow pawh an tel.