Pachhunga University College hnuaia English leh Philosophy Department leh Art & Culture Department te chuan UGC leh State Bank of India bultumin vawiin khan PUC Auditorium-ah ‘National Seminar on Globalisation & Ethnic Identity’ a huaihawt a, Art & Culture Minister Pu P.C.Zoram Sangliana’n Seminar hi a hawng a ni.

Seminar hawnna thuchah sawiin Minister chuan tunlai thiamna changkang tak hmanga khawvel pum inhnaih chilh lehzuala kan khawsa mek (globalisation) hian chibing leh hnambing, mahni hnam nun leh ziarang vei leh humhalh duhtu te inkarah harsatna engemaw chen a thlen thei a ni tiin, khawvel hmun danga thil tha leh changkang nunphung ziarang inhriat tawnna karah, mahni hnam rohlu a riral mai hlauhthawn awmna rilru a piang thei a ni, a ti a. Chutiang taka globalisation-in khawvel pum, chhim leh hmar, chhak leh thlang min tuam mek karah hian duh thuhmun, ngaihdan thuhmun nei thei tura kan hman tangkai thiam erawh thil tul tak a ni, a ti. Pu P.C. Zoram Sangliana chuan Look East Policy kalpui mekah Mizoram pawh a nghawng avangin rilru zau tak put dan he Seminar atang hian kan zirchhuah ngei a beisei thu a sawi a ni.

Ni 2 awh tur Seminar hawnna-ah hian Dr. Tawnenga, PUC Principal; Dr. Margaret Ch. Zama, Director, IQAC, MZU; Art & Culture Director Pu Ngurbiaka leh SBI Regional Manager Pu Lalthuamliana ten thu an sawi a. Seminar hmanpui tura mithiam thlanchhuahte chu NEHU, JNU, Anthropological Survey of India (Kolkata), NERIE (Shillong), Lady Keane College (Shillong), Sikkim University, Govt. Saitual College leh MZU atanga fuankhawm an ni.