Vawiin khan DRDA Conference Hall, New Secretariat Complex-ah Aizawl District huamchhung a sorkar laipui ruahman hmasawnna scheme hrang hrang viltu District Level Vigilance and Monitoring Committee chu an Chairman Lok Sabha MP Pu CLRuala kaihhruaiin an thukhawm.

He meeting-ah hian Aizawl District huam chhunga District Level Rural Development Agency hnuaia Scheme hrang hrang Mahatma Gandhi National Rural Employment Guarantee Scheme (MGNREGS), Indira Awaas Yojana (IAY), Swarnjayanti Gram Swarozgar Yojana (SGSY), Integrated Watershed Development Programme (IWDP), Rajiv Gandhi Gram Vidyatikaran Yojana (RGGVY), Pradhan Mantri Gram Sadak Yojana (PMGSY), Accelerated Rural Water Supply Programme (ARWSP), National Rural Health Mission (NRHM), National Social Assistance Programme (NSAP) leh Total Sanitation Campaign (TSC) hnuaia hna thawh kalpui dan thlirho a ni a. Scheme kalpuitu Department hrang hrang aiawh ten an hmalak dan report pein chak leh zual a hnathawh dan tur ngaihtuahho a ni.

MGNREGS ah hian 2012-2013 chhung khan Aizawl District huam chhungah Job Card holder chhungkaw 25,294 an awm a. Sorkar kum kalta chhung khan ni 100 chhung inhlawhna siam sak an ni. Pu CL Ruala chuan Aizawl District-in ni 100 inhlawhna an puitlin hman chu fakawm tiin District thenkhatah ni 100 tlin hman lo an awm chu thil pawi tak a tling a, hetianga mamawh tlin phak loh anga lan avang hian sorkar laipui atanga sum ruahman in a tlakhniam phah theih a hlauh thu a sawi a. Kum kal mek atang hian ni 100 tlin tum vek turin District zawng zawng a ngen a ni.

Vawiin meeting-ah hian hnathawh tawh leh kal mek dinhmun chip chiar takin an sawi hova. Rawtna hrang hrang an siam zingah he committee hi hna kalphung endik leh vil tur a din an nih angin hmasawnna hna thawh reng reng te chu sum pekchhuah atanga an thawh dante, hna an kalpui mek leh an zawh fel thlenga a hmun ngeia enfiah thin tul an tih thu te sawilan a ni. Mirethei insakna, Indira Awaas Yojana (IAY) hnuaia in pakhat sak nan cheng 48,500 ni thin chu kum thar atang hian cheng 75,000 ah tihsan a nih thu leh amaherawhchu he sum ruahman hian in thar sakna chiah huamin in hlui thawm that lehna a tel loh thu sawilan a ni a, chuvangin IAY hnuaia insak te chu tlo leh daih rei tak tura sak a tul thu an sawiho.

He meeting-ah hian Deputy Speaker Pu John Rotluangliana, Parliamentary Secretary Pu KS Thanga, Deputy Chief Whip Pu RL Pianmawia, Law Commission Chairman Pu R. Lalrinawma, MLA Pu Lalduhawma bakah Aizawl DC Dr Franklin Laltinkhuma leh mipawimawh dang engemawzat an tel a ni.