Vawiin chawhnu khan Planning and Programme Implementation Department Conference Hall-ah State Planning Board Member-Secretary (i/c Skill Development) Pu Haukhuma Hauzel, IAS (Rtd.) kaihhruaiin National Skill Qualification Framework chungchang zirho a ni.
Pu Haukhuma Hauzel chuan December ni 27, 2013-ah khan central sawrkara Ministry of Finance-in National Skill Qualification Framework (NSQF) chungchangah Notification a lo chhuah tawh thu a sawi a. Zirlaiten state danga admission tih an tum leh hna an zawn changin an certificate/ diploma/ degree neihte pawm loh a nih fo avangin harsatna a siam thin a. India rama kan educational qualification hi ram dangah hriatpui a nihloh chuan a tlukpui exam ziah a ngai thin a, hei hian eizawnna kawngah harsatna a siam a. India ram bikah technical/ vocational education hi general education aia dah hniam zawkna a awm thin avangin, zirlaite zirlaia tui lemlo te pawhin general education an zir phah a tul a, graduate an nih rualin eizawnna an hmulo tlangpui bawk a ni, a ti. Industry mamawh leh zirlai curriculum inan loh avangin graduate hna hmulo India ramah an tam phah reng a ni tiin he harsatna sukiang tur hian NSQF in a tum ber chu kan ram mai bakah khawvel ramdang tlukpuia zirna certificate/ diploma/ degree rualkhai zawka kalpui a ni, a ti a. Zirna leh eizawnna kawngah thui takin kawngro a su dawn a ni, a ti bawk.
NSQF hian pawl 9 tlukpui Level 1 atanga Doctorate tlukpui Level 10 thleng certification a siam dawn a. NSQF certificate hi sawrkarin zirna tluang pangngaia degree a pawm ang thova a pawmpui dawn avangin zirlaite hian an certification level a zirin general leh vocational-ah duh an thlang thei dawn a ni. Lehkha zirna lama zir sang lo te hnenah an thiam thil a zirin NSQF hian an level tluk ang zelin certification a siamsak ang. Hei hian zirna leh hna zawnna kawngah awlsam takin a pui dawn a ni.
NSQF hnuaiah hian mawhphurtu tur pali – State sawrkar, National Skill Development Corporation, Sector Skill Council leh NSDC Training Partner-te an awm dawn a ni. Framework hi Notification chhuah atanga kum 3 chhunga NSQF zawm lo school, university, ITI leh zirna in hrang hrangte tan sawrkar tanpuina engmah an dawng thei tawh dawnlo a, kum 5 chhungin an zawm ngei ngei a ngai dawn a ni.
He hunah hian Mizoram Skills Development Society Project Director Pu Daniel Hauhnar chuan presentation pe in, sawrkar Department hrang hrang 17 aiawhin officer te an kalkhawm a ni.
