Vawiin khan Mizoram Upa Pawl (MUP), Kolasib Sub-Hqrs Assembly vawi 11-na chu Awithangpa Hall, Kawnpuiah neih a ni a, he hun hi Parliamentary Secretary, Tuirial Bialtu MLA ni bawk Pu Hmingdailova Khiangte chuan Khuallian niin a hmanpui.

Khuallian Pu Hmingdailova Khiangte chuan thusawiin MUP-a tel hi a hrisel a ni. Kum lama upa kan nih tawh avangin MUP-a kan tela, Khawmpui kan kal te hian kan rilru leh taksa kan sawizawi reng a, hei hi kan hriselna atan a pawimawh em a ni. Upate hi tawnhriat ngah leh mifing tak tak awmkhawm in ni a, sorkar thurawn petu leh sorkar pawhin kan rawn ber te in ni a, hei vang hian MUP te hi Mizorama NGOs zingah chuan a pawimawh ber te zinga mi a ni.

Tawn hriat ngah in nih tawh avangin pawl dang pawhin an chhoh en che u a. Ka tar tawh em mai. Engmah ka ti thei tawh lo ti mai lovin, kan sorkar hian a mamawh che u a ni tih hre reng turin ka duh che u a ni a ti. He pawl inkaihhruaina leh he pawl hrim hrim hi UNO duh zawng a nih thu a sawi bawk a ni.

He Assembly hi Pu C. Lianzuala, Sub-Hqrs President-in a kaihruai a, General Hqrs. President Pu R.K. Thanga chu Khual zahawm a ni bawk a ni. Khual zahawm hi General Hqrs. Secretary Pu Sainghinga Sailo leh hruaitu dang ten an tawiawm.

Khual zahawm Pu R.K. Thanga pawhin thu sawiin kan inzirtirna Mite tana malsawmna nih chu vawng reng turin kalkhawm te a fuih a, tawn hriat leh finna te chu hmang thiam a, khawtlang mai bakah chhungkua-ah pawh tar phunchiar ni mai lova, tawn hriat finna te chu hmang turin a fuih bawk a ni.

He Assembly-ah hian Sub-Hqrs huam chunga Members boral mi 259 sunna hun hman a ni a, Kawnpui Banglaveng Branch YMA Zaipawl ten Sunna hla an sa bawk a ni. Chawhnu lamah Rorel a ni a, tlaiah chaw hlui an kilho nghal a ni.

He Assembly-ah hian Palai 210 chuang an kalkhawm.