Vawiin khan National Statistics Day 2019 chu Directorate of Economic and Statistics, New Capital Complex ah hman a ni.

National Statistics Day 2019 hmanna ah hian  Pu H.Rammawi, Vice Chairman , Mizoram State Planning Board chu khuallian a ni a. Khuallian hian Directorate of Economic and Statistics buatsaih Medical Certification of Causes of Death (MCCCD), Mizoram 2018 leh Annual Report Registration of Births and Deaths, Mizoram 2018 te a tlangzarh a ni. Hei bakah hian kum tam tak chhunga  Statistical Data, a kum  indawta awmze nei thlap a remkhawm dahthatna zempui Time Series Statistical Database chu a hawng nghal bawk. Time Series Statistical Database ah hian parameter leh indicator pakhat zelah Mizoram State leh District in data pakhat a nei tawh anga, hei hian data dik lo te tibovin, Mizoram pumah "One State One Statistics" chu a awm thei tawh dawn a ni. Hei hian kumin Statistics Day thupui "Sustainable Development Goals" a chawm dawn bawk a ni.

Khuallian Pu H. Rammawi, Vice Chairman, Mizoram State Planning Board chuan hmasawnna atana hna thawh dawh apiangin Data a pawimawh thu a sawi a.  Tun hma lamin Mizoramah data mumal chhinchhiah a awm loh thin avangin hmasawnna tura ruahmanna te a taka kalpui a har thin thu a sawi a ni. Pu H.Rammawi hian kalkhawm mipuite hmaah Mizoram in enge a mamawh ber tih hi an in zawh a ngaih thin thu a sawi a, eng hna pawh thawk dawn se a thawhdan, kalpui dan tur leh a awmzia te hriat chian phawt a ngai tawh a ni a ti a, heng zawng zawng te pawh hi data tha leh mumal tel lovin a tih theih loh a ni a ti.

Planning Secretary Dr.C.Vanlalramsanga pawhin thu sawiin kumin National Statistics Day-a thupui "Sustainable Development Goals (SDG)" ah hian Mizoram chu India ramah a tih hlawhtlinna tur atana hma la tha ber pawl a nih thu a sawi a. SDG dahsboard siamna atan pawh a thawh hlawk hle a, NITI Aayog in baseline index a tih chhuah Mizoram chu a ti tha pawl niin India ram pumah 6-na dinhmun a luah mek ani a ti.