Tripura refugee Camp a Bru awm mek te laklet dan tur ngaituahin vawiin khan Kolasib DC Conference hall ah Bawrhsap Pu Zoengsanga kaihhruaina hnuaiah thutkhawmna neih a ni.

Bawrhsap Pu Zoengsanga chuan Bru laklet chungchangah hian Nodal Officer te bakah VC leh Administrative Officer for Bru repatriation (AO) te chu an pawimawh hle dawn ani tiin mahni hmazawna hna awm te chu uluk leh fimkhur taka thawkin an hnathawh chu a felfai tur ani a ti a, tui dah khawlna tur, kawlphetha leh lamlian chungchanga hmalakna te a zawt fiah a, hemi bakah hian Bairabi a zan khat an chawlh lailawk na tur ‘Staging Area’ sak dan tur bakah Temporary Shelter leh Community Kitchen siam/sak dan tur te pawh sawiho a ni. Bawrhsap chuan hemi kaihhnawiha hmalakna tur leh ruahmanna hrang hrang siam te chu July ni 15 hma a thehlut vek turin a hriattir bawk.

He hunah hian Kolasib District a Bru ho let na tur khua a VCP te leh AO te  chuan an harsatna tawh dan hrang hrangte report an pe a, kawng awlsam zawk leh felfai zawk tura an ngaih chungchangah te pawh rawtna an thlen bawk a ni.

Kolasib District a Bru lak let tur te hi khaw sawm (10) a dah tur an ni a, Dilzau ah chhungkaw 55, Saihapui (k) ah chhungkaw 57, N.Thinglian ah chhungkaw 157, Hortoki ah chhungkaw 131, Pangbalkawn ah chhungkaw 45, bairabi (zophai) ah chhungkaw 54, Bukvannei ah chhungkaw 45, Meidum ah chhungkaw 45, South Chhimluang ah chhungkaw 154, Zodin (rastali) ah chhungkaw 79 niin, Kolasib District a Bru chhungkaw lak let tur hi an vaiin chhungkaw 822 niin mihring 5047 vel ni tura beisei an ni. Tun dinhmunah nikuma khakchangpara leh hamsapara camp atanga laklet chhungkaw pahnih  Pu Lalnunfela te chhungkua leh Pu Hriata te chhungkua chu  meidum leh rastali khua ah an cheng mek a ni.

He hunah hian Bru ho let na tur khaw hrang hranga VCP, VC Member, AO leh Bru laklet kaihhnawiha Nodal Officer hrang hrangte an kalkhawm a ni.