968/2025-2026

Dated Hnahthial, the 27th June, 2025: National Statistics Day vawi 19-na pualin vawiin khan Govt. Hnahthial Higher Secondary School Hall-ah hun hman a ni a, "75 Years of National Sample Survey" tih thupui (Theme) hmanga hun hman a ni. District Research Officer (DRO), Pu PC Vanlalrova chuan he hun hi kaihruaiin Addl DC, Pu Zothanmawia Khiangte chu khuallian a ni a. Hun kaihruaitu chuan he ni hman a nih chhan te sawfiahin khuallian chuan statistics pawimawhna hrang hrang a sawi bawk.

Khuallian, Addl. DC, Pu Zothanmawia Khiangte chuan Statistics dik tak neih a tulna te sawiin kan ram dinhmun tarlangtu pawimawh tak a nih thu a sawi a. Data kan lakkhawm atang hian kan ram kal zel dan tur ruahmanna hrang hrang, schemes leh policy kan tihte hi duan thin a nih thu sawiin statistics diklo chuan ram kalphung a tibuai thei hle a ni a ti a. Sawrkar-ah chang ni lo, Science leh Sumdawnna kawngah pawh hma la tur chuan statistics dik leh rintlak hi thil pawimawh hmasa a nih thu sawiin ziak leh chhiar thiam awm zat, sawhthing lei tur zat leh kan ram hmasawnna thil nghawng hrang hrang bul tanna chu data lakkhawm, statistics ah a nih thu a sawi a. "Ruahmanna dik tak siam tur chuan kan dinhmun hriat a ngai a, chumi hre tur chuan statistics dik a awm a ngai a ni" tiin he hun hman chhan, Statistics pawimawh zia a tarlang a ni.

Khuallian chuan kalkhawm zirlaite hnenah thu sawiin an nih tumah chiang tura a duh thu a sawi a. Lehkha zir satliah lova tum mumal tak neih a tulna sawiin Hnahthial hma hun chu anni hovah a innghat a ni a ti a. Hnahthial atangin sawrkar hna pawimawh chelh an awm tam tawk loh thu tarlangin anmahni tan mai ni lova Hnahthial tan tan la turin a fuih nghal bawk.

Hun kaihruaitu, Pu PC Vanlalrova, DRO chuan lawmthu sawina in he hun hi a khar a ni.