National Technology Day chu vawiin khan Directorate of Science & Technology buatsaihin a lawman hun I&PR Auditorium-ah neih a ni a. He hunah hian Mizoram State Planning Board Vice Chairman Pu H. Liansailova chu khuallian a ni.
Khuallian chuan thu sawiin, technology hmasawnna in min chhawpchhuah hrang hrangte tello hian nun thiam a harsa tawh hle dawn a ni, tiin mihring nuna technology pawimawhzia a tarlang a. India ramin zalenna a sual chhuah hnu a technology kawnga hma a sawn chhoh dan thlirin National Technology Day hman chu inhmeh a tih thu a sawi a. Mizoramah pawh kan hnam naupan ngaihtuahin mithiam tak tak, India rama zirna in tha ber ber atanga zirchhuak hmuh tur an awm ta nual a, chung mai bakah tualchhungah technology kaihhnawih institute-te kan nei ta zel hian kan hmasawnna a ni, tiin Pu H.Liansailova chuan state-in heng mithiam a neih te hian ram leh mipui hmasawnna tur ngaihtuah an thiamna te hmang tangkai turin a chah a ni.
Khuallian chuan Sorkar pawhin New Economic Development Policy hnuaiah ram hmasawnna atan technology pawimawhzia hriain mahni thiamna hmanga tihdan thar tha leh hlawk zek leh tangkai ngaihtuahchhuaktu, innovator-te a ngaihpawimawh thu a tarlang a. Kuthnathawh kawngah pawh hmanlai kan Pipute lo neih dan kalphung ang chauhva hna kan thawh chuan hma sawn ngaihna awmloh tur thu leh, khawvel hmasawnna nen inphaman tur chuan tunlai thiamna leh hmanraw tha hmanga hlawk zawka hma lak a tul thu a sawi a ni.
National Technology Day puala hun buatsaih hi Dr. C. Vanlalramsanga, Planning Department (Science & Technology) Secretary chuan a kaihruai a. New Economic Development Policy (NEDP) hnuaia Science & Technology-in a hnathawh tur 'Development of Indigenous Technological Innovation in Mizoram (DITIM)' sawi hawnna leh sawi zauna Chief Scientific Officer, Dr. R.K. Lallianthanga'n a nei bawk. NEDP hnuaiah Science & Technology Department-te kaltlangin Innovation Facility Centre din a nih tur thu leh, chu centre kaltlanga Mizo local innovator-ten ram tana tangkai khawl tha tak tak an la siamchhuah beisei a nih thu a sawi a. DITIM hnuaiah hian Mizoram chhunga mite thil hmuhchhuah leh siamchhuah chawh nun sak a thil tha zawk an siam theih tura science and technology thiamna hmanga tanpui te, innovator-te sum sen tlem zawka an hman theih tur khawl tha zawk leh hman man tlawm zawk chhawpchhuah leh an thil siam chhuah leh ngaihtuah chhuah te Intellectual Property Rights (IPR) dan hmanga vawn him kawnga hmalakpuite a tel a ni.
Vawiina hun hmanah hian Mizorama Science leh Technology lama hnathawk tha leh sul lo sutu mimal Dr. LN Tluanga, Mission Veng; Dr. R. Kapthuama, Khatla; Er. Dunglena, Laipuitlang leh Dr. Vanlalzara, Khatla te hnenah chawimawina hlan a ni a. Science leh Technology hmasawn nan atana pawl hrang hrang – Mizoram Science Society, Science Teachers' Association Mizoram, Mizo Academy of Sciences leh Mizoram Mathematics Society hnenah chawimawina hlan a ni bawk. He hunah hian sorkar technical department atanga mi pawimawh hrang hrang bakah zirna in NIELIT, Zuangtui, Women Polytechnic leh ITI atang tein zirlai leh zirtirtu an tel a ni.
National Technology Day hi kum 1998-a India in ama kutchhuak technology khawvel hriata a phochhuah ni a ni a. Khatih hunlai khan khawvel hriatah India ram chu Nuclear siam thei ram a nih zia lantir nan Rajasthan a Pokran-ah Nuclear hlawhtling takin a enchhin a, 'Trisul' Missile hawhtling takin a enchhin bawk, Thlawhtheihna 'Hansa-3' an vuah chu he mi ni hian hlawtling takin a thlawhtir bawk a ni. Kum 1999 atang khan kum tin ram hmasawnna atana technology pawimawhna inhrilh hriatna leh inzirtirna hun atan he ni hi hman ziah thin a ni.
