Kolasib a District Treasury Office building leh Assistant Commissioner of Taxes Office building, Project Veng a mi chu vawiin khan Minister, Finance & Taxation etc. Pu Lalsawta'n a hawng.

Hawnna inkhawm I&PR Conference Hall, Project Veng, Kolasib a neih a Minister chuan building pahnih tha taka sa tu Pu CT Mawia, Kolasib 1st class contractor hnenah lawmthu sawiin, PWD Project Division-II a hnathawktu te uluk taka an vil avang leh Department hotute thahnemngaihna te lawmawm a tih thu a sawi a. Minister chuan mipuite chu chhiah pe hreh lo tura hrilhin, hmasawnna hriltu pawimawh tak a ni a ti a. Sumdawngte phei chuan thil leitu ten an thil lei rualin VAT an pe tel nghal a, sorkar a pek luh tur an lo kawl hawh a ni tih hria a, kawl reilo a pek thuai thin tur a ni a ti a. Hetih rual hian sumdawnna chungchangah chimral kan nih loh nan mipui kan tanrual a ngai a ni a ti a. 1st July, 2017 atang Goods & Services Tax hman tan tur anih avangin, a hun taka hman tan anih theih nan hmalak mek zel a ni a ti a.

NEDP chungchang sawiin Finance Minister chuan he policy hi tangte tanpuina a nih angin, mahni eikhawp tharchhuah duhtawk mai lova hlawkpui tham a hnathawh leh thar tam chu thupui bera dah a ni a. Hemi atan hian khawl, cold storage leh hmanrua leh hmunhma tha NEDP hnuaiah hian siam zel a ni dawn a ti a. Sorkar hnathawk kalkhawmte hemi kawnga kuthnathawktute kaihruai tha tur leh an kalna apianga mipuite fuih phur zel turin a sawm a ni.

Hawnna inkhawm hi Pu Lalmalsawma, Secretary, Finance Department in kaihruaiin, Kolasib Deputy Commissioner Dr Arun T in kalkhawmte lawmna thu a sawi a. Building sak dan report  Pu Lalthanzuala, Sr.EE, PWD, Project Division II in a pe a ni.

Vawiina hawn tak hi office building pahnih a ni a. Assistant Commissioner of Taxes Office building hi Rs.281 lacs senga a sak niin, 29th July, 2014 khan sak tan a ni a, 19th July, 2016 khan sak zawh a ni. He building hi chhawng thum a sak niin, office mai bakah rest house leh officer quarters pahnih a awm tel nghal a ni. Assistant Commissioner of Taxes Office, Kolasib ah hian thawktu 24 an awm mek a ni.

District Treasury Office building hi Rs.137 lacs senga sak a ni a, 12th February, 2015 a sak tan niin 23rd June, 2016 khan sak zawh a ni a. Building hi chhawng khat a sak a ni. Treasury Office, Kolasib ah hian Treasury Officer hovin hnathawktu 12 an awm mek a ni.

Building hawnna inkhawm zawh hian Pu Lalsawta, Minister, Finance & Taxation etc. chuan kolasib district chhunga sorkar department hotute I&PR Conference Hall-ah hian a kawm nghal a. He inkawmhonaah hian NEDP hnuaia district chhunga hmalakna leh hnathawh zel dan tur te sawiho a ni.