Nimin khan Lawngtlai DC Conference Hall-ah Health Department buatsaihin naupang thihna tihniam tura sawrkar ruahmanna chungchang inhrilh hriatna (district level sensitization workshop on child death review) hun hman a ni.

He hun hi Lawngtlai Chief Medical Officer Dr Thani Pachuau chuan a kaihruai a. Kal khawmte lawmna thu sawiin, hun hman chhan leh a thil tum te a sawi fiah nghal a. Child death review awmzia sawiin, naupang kum 5 chin thihna tam lutuk a lo hniam theih nana sawrkar ruahmanna a nih thu leh naupang thih chhan tak chhui chian a, chumi chu siam tha tura hma lakna tur a nih thu a sawi a. Lawngtlai District chu naupang thi tamna (high priority district) a nih avangin khawtlang hruaitute leh tlawmngai pawlte nen tang tlanga theih tawp chhuaha hma lak a tul a ni, a ti.

He workshop-ah hian VC member hmeichhia te, MHIP, LWA leh kohhran ai awhte koh khawm an ni a. District Programme Manager Pi Lalkhawngaihdawngi Chinzah chuan naupang thihna leh an hriselna chungchanga Lawngtlai District dinhmun leh hma lak ngaihna lai te a sawi a. District Hospital-a Medical Officer Dr Paul Lalchungnunga chuan child death review (CDR) pawimawhna leh a hna thawh dan tur te, block, facility leh district level-a CDR Committee hrang hrang din dan tur leh a kalphung tur te a sawi bawk.

Lawngtlai District-ah kum 2015-16 chhung khan nau piang 1527 zingah kum 1 an tlin hmaa thi 42 an awm a, IMR (nau piang 1000 zela nausen thi zat) chu 27.5 a ni. Kum 2016-17 chhunga nau piang 1461 zingah 59 thiin, IMR 40.3 a ni thung a. Kum 2016-17 chhung khan naupang (kum 1-5 inkar) thi 21 an awm bawk. District Hospital-ah nausen piang hlim thla 1 hnuai lam enkawl zuina SNCU (sick/special newborn care unit) chu kum 2015 atang khan hawn niin, kum 2017 March thla thleng khan nausen 114 dah luh an ni tawh a, chu’ng zingah chuan thi 4 an awm.

CDR hi nausen leh naupang thi zat tihniam tura hma lakna pawimawh tak a ni a. Naupang kum 5 hnuai lam chu anmahni inah emaw damdawi inah emaw an thi a nih pawhin, darkar 24 chhung ngeiin mahni bialtu health worker hnenah hriattir tur a ni a. Health worker chuan a tul anga bawhzuia chhui chiangin, a chhan leh a vang dik tak a chhui chhuah chu CDR committee-ah an thlen leh ang a, committee chuan a tul ang zelin hma lak dan tur a lo duang leh dawn a ni. Naupang thih chhan dik tak chhui chhuah a nih chuan harsatna sut kian leh chin fel dan tur a hriat theih dawn a ni.

 

lht

 

Attachment

  • Loading attachment...